ڈالر کے مقابلے روپے کی قدر میں مزید اضافہ

انٹربینک مارکیٹ میں جمعہ کو بھی ڈالر کے مقابلے روپے کی قدر میں اضافے کا سلسلہ جاری ہے۔

کاروبار کے اختتام پر ڈالر کے مقابلے میں روپیہ ایک پیسے کی بہتری سے 279.95 روپے پر بند ہوا۔

یاد رہے کہ جمعرات کو مقامی کرنسی 279.96 روپے پر بند ہوئی تھی۔

عالمی سطح پر امریکی ڈالر جمعہ کو مسلسل تیسرے ہفتے بھی اضافے کی جانب گامزن رہا۔ یہ بہتری امریکہ کے مثبت معاشی اعدادوشمار کے بعد سامنے آئی جس نے فیڈرل ریزرو کی جانب سے مستقبل قریب میں شرح سود میں کمی کی توقعات کو کم کردیا ہے۔

بے روزگاری کے ہفتہ وار اعدادوشمار میں غیر متوقع کمی کے بعد گزشتہ رات ڈالر کی قدر میں اضافہ ہوا اور ایشیائی مارکیٹ میں صبح کے کاروبار کے دوران بھی یہ مستحکم رہا۔ دوسری جانب، جاپانی ین ایسی سطح پر برقرار رہا جہاں اپنی کرنسی کے دفاع کے لیے جاپان کی جانب سے کرنسی مارکیٹ میں مداخلت کا خطرہ موجود تھا۔

روزگار کے بہتر ہوتے ہوئے اعداد و شمار اور مرکزی بینک کے پالیسی سازوں کی جانب سے مہنگائی پر تشویش کے اظہار کے بعد، فیڈ فنڈز فیوچرز نے شرح سود میں اگلی کٹوتی کی توقعات کو جون تک مؤخر کر دیا ہے۔

ڈالر انڈیکس معمولی تبدیلی کے ساتھ 99.36 پر برقرار رہا اور رواں ہفتے 0.2 فیصد اضافے کی جانب بڑھتا دکھائی دیا۔ یورو 1.1607 ڈالر پر مستحکم رہا۔

جاپانی ین امریکی ڈالر کے مقابلے میں 0.05 فیصد مضبوط ہو کر 158.58 ین فی ڈالر پر پہنچ گیا تاہم مجموعی طور پر اس ہفتے تقریباً 0.5 فیصد کمی کا امکان ہے۔