یوکرین کے دو بڑے شہروں پر سال کا شدید ترین روسی میزائل حملہ ، حکام اور میڈیا کی تصدیق

یوکرینی حکام اور میڈیا کے مطابق روسی افواج نے منگل کی علی الصبح یوکرین کے دو بڑے شہروں پر اس سال کا شدید ترین میزائل حملہ کیا، جس کے نتیجے میں شمال مشرقی شہر خارکیو میں چار افراد ہلاک ہو گئے۔

کیف کی فوجی انتظامیہ کے سربراہ تیمور تکاچینکو نے بتایا کہ دارالحکومت پر مختصر مگر شدید میزائل حملہ کیا گیا۔ خبر رساں ادارے روئٹرز کے نمائندوں نے شہر میں دھماکوں کی آوازیں سنیں، تاہم جانی یا مالی نقصان کی فوری طور پر کوئی اطلاع موصول نہیں ہوئی۔

یوکرین کی مانیٹرنگ کرنے والے ٹیلی گرام چینلز کا کہنا ہے کہ رات گئے ایک گھنٹے کے دوران تقریباً 20 بیلسٹک میزائل داغے گئے، جسے انہوں نے رواں سال کا اب تک کا سب سے طویل اور مسلسل حملہ قرار دیا ہے۔

روئٹرز آزادانہ طور پر ان ٹیلی گرام رپورٹس کی تصدیق نہیں کر سکا۔ یوکرین کی مسلح افواج نے بھی حملے کی مکمل شدت پر فوری طور پر کوئی تبصرہ نہیں کیا، جبکہ روس کی جانب سے بھی ان حملوں کے حوالے سے کوئی بیان سامنے نہیں آیا۔

سرحد سے 30 کلومیٹر (18 میل) دور واقع شہر خارکیو، جو اکثر روسی حملوں کا نشانہ رہتا ہے کے بارے میں علاقائی گورنر اولیہ سینیہوبوف نے بتایا کہ شہر کے مضافات میں ہونے والے حملے میں چار افراد ہلاک اور چھ زخمی ہوئے۔

فروری 2022 میں جارحیت کے آغاز سے اب تک روس نے متعدد بار یوکرینی شہروں کو میزائلوں اور ڈرونز سے نشانہ بنایا ہے۔ ان حملوں میں خاص طور پر توانائی کے ڈھانچے (انرجی انفرااسٹرکچر) کو نشانہ بنایا جاتا ہے ۔