ویمنز کرکٹ کے فروغ کے لیے پی سی بی کا پیپسی کے ساتھ اشتراک

پاکستان کرکٹ بورڈ(پی سی بی) نے پیپسی کے تعاون سے پلے بورڈ اقدام کا آغاز کیا ہے، جو نچلی سطح (گراس روٹس) پر مرکوز ایک پروگرام ہے جس کا مقصد پاکستان بھر میں نوجوان خواتین کے لیے کرکٹ کے سامان تک رسائی کو بہتر بنانا ہے۔

اس اقدام کے تحت منتخب آؤٹ ڈور بل بورڈز کو پلے بورڈز میں تبدیل کیا گیا ہے، جہاں خواتین کے لیے خاص طور پر تیار کردہ کرکٹ کا سامان دستیاب ہوگا۔

یہ سامان خواہش مند خواتین کرکٹرز عاریتی نرخوں پر حاصل کر سکتی ہیں، پریکٹس یا کھیل کے لیے استعمال کر سکتی ہیں اور بعد ازاں کمیونٹی کے مشترکہ استعمال کے لیے واپس بھی کر سکتی ہیں۔

یہ پروگرام خواتین کو کھیل کے ابتدائی مرحلے میں درپیش ایک بڑے مسئلے یعنی موزوں کھیل کے سامان تک محدود رسائی کو حل کرنے کے لیے بنایا گیا ہے۔

اس اشتراک کے تحت عوامی مقامات پر پلے بورڈز نصب کیے گئے ہیں ، تاکہ خواتین کی شرکت کی حوصلہ افزائی ہو اور کھلی و مشترکہ جگہوں پر خواتین کے کرکٹ کھیلنے کے عمل کو معمول بنایا جا سکے۔

یہ اقدام خواتین کرکٹ کے نظام کو مضبوط بنانے کے لیے پی سی بی کی جاری کوششوں سے ہم آہنگ ہے، جس میں گراس روٹس سطح پر شرکت کے مواقع کو فروغ دیا جا رہا ہے۔

پی سی بی ویمنز کرکٹ کی سربراہ رافعہ حیدر نے کہا کہ ملک میں خواتین کرکٹ کی ترقی کے لیے رسائی ایک بنیادی ستون کی حیثیت رکھتی ہے۔ ان کا کہنا تھا کہ پلے بورڈز جیسے اقدامات نوجوان کھلاڑیوں میں اعتماد پیدا کرتے ہیں کیونکہ انہیں کھیلنے، تربیت حاصل کرنے اور آگے بڑھنے کے لیے درست وسائل فراہم کیے جاتے ہیں۔

انہوں نے مزید کہا کہ کمیونٹی کے لیے کھیل کی نمائش اور رسائی میں اضافہ مستقبل کے لیے ٹیلنٹ پول کو وسعت دینے میں اہم کردار ادا کرتا ہے۔

پیپسی کو پاکستان کی سینئر ڈائریکٹر مارکیٹنگ حکیمہ مرزا نے کہا کہ یہ اقدام کرکٹ کے ذریعے شمولیت کے فروغ کے لیے پیپسی کے عزم کی عکاسی کرتا ہے۔

ان کے مطابق “اب ہے تمہاری باری” نوجوان خواتین کو آج ہی میدان میں قدم رکھنے کا موقع دینے کا پیغام ہے، جس کے تحت بنیادی رکاوٹوں کو دور اور کھیل کی ابتدائی سطح پر شرکت کو سہارا دیا جا رہا ہے۔

پی سی بی شراکت داروں کے ساتھ ملکر کھیل کے تمام شعبوں میں مساوی مواقع کے فروغ اور شرکت کے دائرہ کار کو وسعت دینے کے لیے کام جاری رکھے ہوئے ہے۔ رسائی، نمائش اور معاونت پر مبنی اقدامات پاکستان میں خواتین کرکٹ کی طویل المدتی ترقی کی حکمت عملی کا مرکزی حصہ ہیں۔

کاپی رائٹ بزنس ریکارڈر 2025