اسٹاک مارکیٹ میں تیزی ، 100 انڈیکس ایک لاکھ 62 ہزار سے پوائنٹس عبور

پاکستان اسٹاک ایکسچینج (پی ایس ایکس) میں جمعہ کو ٹریڈنگ کے آغاز سے ہی خریداری کا سلسلہ جاری رہا۔

شام 4 بجکر 20 منٹ پر بینچ مارک انڈیکس 1,354.92 پوائنٹس یا 0.84 فیصد کے اضافے سے 162,012.41 پوائنٹس پر جاپہنچا۔

قبل ازیں بینچ مارک کے ایس ای 100 انڈیکس ایک ہزار سے زائد پوائنٹس کے اضافے سے ایک لاکھ 61 ہزار کی سطح پر بحال ہوا۔

آٹو موبائل اسمبلرز، کمرشل بینکس، کھاد ساز کمپنیوں، آئل اینڈ گیس ایکسپلوریشن کمپنیوں، او ایم سیز، پاور جنریشن اور ریفائنری سمیت اہم شعبوں میں خریداری دیکھنے میں آئی۔ او جی ڈی سی، پی او ایل، پی پی ایل، پی ایس او، وافی، ایچ بی ایل اور ایم سی بی بھی مثبت زون میں ٹریڈ کرتے نظر آئے۔

باخبر ذرائع نے بزنس ریکارڈر کو بتایا کہ کارپوریٹ صورتحال کے محاذ پر کےالیکٹرک بورڈ آف ڈائریکٹرز نے جمعرات کو اپنا اجلاس مؤخر کر دیا، کیونکہ ایجنڈے کے پہلے نکتے کی منظوری کے فوراً بعد ایک گروپ اجلاس سے واک آؤٹ کر گیا۔

ذرائع کے مطابق حکومت اور ایشیاپیک کے نمائندہ ڈائریکٹرز کا بنیادی مقصد کے الیکٹرک کے چیف ایگزیکٹو آفیسر (سی ای او) سید مونس عبداللہ علوی کو ہٹانے سے متعلق فیصلہ کرنا تھا۔ بورڈ کے بعض اراکین کی حالیہ سرگرمیوں نے سعودی عرب کے الجمیح گروپ کو شدید برہم کر دیا ہے جو پہلے ہی اسلام آباد کو 2 ارب ڈالر کا قانونی نوٹس بھجوا چکا ہے۔

گزشتہ روز (جمعرات) پاکستان اسٹاک ایکسچینج (پی ایس ایکس) میں تیزی کا رجحان برقرار رہا، اور سیمنٹ سیکٹر میں انضمام اور حصول کی سرگرمیوں کے بعد پیدا ہونے والے نئے اعتماد کے باعث سرمایہ کاروں کے حوصلے مزید مضبوط ہونے سے بینچ مارک انڈیکس تیزی سے اوپر بند ہوا۔ کے ایس ای 100 انڈیکس نے مضبوط پیش قدمی دکھاتے ہوئے کاروباری سیشن 160,657.50 پوائنٹس پر ختم کیا، جو 2,473.55 پوائنٹس یا 1.56 فیصد کا نمایاں اضافہ ہے۔