پی آئی اے کی نجکاری سے قبل انجینئرنگ عملے کیلئے خصوصی الاؤنس منظور

پاکستان انٹرنیشنل ایئرلائنز (پی آئی اے) کے بورڈ آف ڈائریکٹرز نے انجینئرنگ ڈپارٹمنٹ کو اس کی کارکردگی اور قومی ایئرلائن کی ممکنہ نجکاری کی روشنی میں ایک خصوصی الاؤنس دینے کی اصولی منظوری دے دی ہے۔ ترجمان پی آئی اے نے بتایا کہ اس فیصلے پر کچھ عرصے سے غور جاری تھا۔

ترجمان نے یہ بات انجینئرنگ ڈپارٹمنٹ کی کارکردگی کا جائزہ لینے کے لیے منعقدہ پی آئی اے بورڈ آف ڈائریکٹرز کے اجلاس سے متعلق ایک بیان میں کہی۔

اس موقع پر فورم کو دی گئی بریفنگ میں جدید حفاظتی معیارات کی پاسداری پر توجہ مرکوز کرتے ہوئے ڈپارٹمنٹ کی گزشتہ دو سالوں کی کارکردگی کا جائزہ لیا گیا۔

بورڈ نے پانچ سال کے وقفے کے بعد یورپی اور برطانوی پروازوں کے آپریشنز کی اجازت دوبارہ حاصل کرنے کے لیے اٹھائے گئے اقدامات کا بھی جائزہ لیا۔

انجینئرنگ ڈپارٹمنٹ کی کارکردگی اور طریقوں کا ملکی اور بین الاقوامی ہوا بازی کی صنعت کے ساتھ تقابلی جائزہ لیا گیا۔

بورڈ نے طیاروں کی جامع دیکھ بھال اور انہیں دوبارہ پروازوں کے آپریشنز میں واپس لانے کی کوششوں کو سراہا۔

مزید برآں بورڈ نے یہ ہدایت بھی کی کہ پی آئی اے کی نجکاری سے پہلے درکار تمام ضروری منظوریاں جلد از جلد مکمل کی جائیں۔

اس کے علاوہ، پی آئی اے کے مزید اثاثوں کو حکومت کی ملکیت والی ہولڈنگ کمپنی کو منتقل کرنے کی تجویز کا جائزہ لیا گیا۔

اس کے ساتھ آئندہ سال کے آپریشنل منصوبے میں معاونت کے لیے ضروری طیاروں کے انجنوں اور فاضل پرزوں کی مرمت کی بھی منظوری دے دی گئی۔