غنی کیمیکل کے سی ای او اور ایگزیکٹو ڈائریکٹر کی تنخواہ میں اضافہ کردیا گیا

غنی کیمیکل انڈسٹریز لمیٹڈ (جی سی آئی ایل) نے بدھ کو اعلان کیا کہ 2022 کے بعد پہلی مرتبہ کمپنی نے چیف ایگزیکٹو آفیسر (سی ای او) اور ایگزیکٹو ڈائریکٹر کی تنخواہوں کا ازسرِنو تعین کیا ہے۔

کمپنی نے تفصیلات پاکستان اسٹاک ایکسچینج (پی ایس ایکس) کو بھیجے گئے نوٹس میں جاری کیں۔

نوٹس کے مطابق چیف ایگزیکٹو آفیسر اور ایگزیکٹو ڈائریکٹر (عتیق احمد خان) کی تنخواہ 14 لاکھ 50 ہزار 625 روپے ماہانہ سے بڑھا کر 20 لاکھ روپے ماہانہ کر دی گئی ہے۔

نوٹس میں مزید بتایا گیا کہ مسروّر احمد خان کو بورڈ آف ڈائریکٹرز کا چیئرمین دوبارہ تعینات کیا گیا ہے جبکہ حافظ فاروق احمد کو ایک بار پھر چیف ایگزیکٹو آفیسر مقرر کیا گیا ہے۔ اس کے ساتھ زبیر صدیقی کو جی سی آئی ایل سمیت گروپ کی دیگر کمپنیوں کا صدر تعینات کیا گیا ہے۔

کمپنی 2015 میں پاکستان میں ایک پرائیویٹ لمیٹڈ کمپنی کے طور پر قائم کی گئی تھی اور 2017 میں اسے پبلک لمیٹڈ کمپنی میں تبدیل کر دیا گیا۔

کمپنی کی بنیادی سرگرمی طبی اور صنعتی گیسوں اور کیمیکلز کی تیاری، تجارت اور فروخت پر مشتمل ہے۔