سخت گیر تاکائچی ووٹنگ میں کامیاب، جاپان کی پہلی خاتون وزیراعظم ہونگی

جاپان کی قدامت پسند سیاست دان سناے تاکائچی منگل کے روز پارلیمنٹ کے زیریں ایوان میں اہم ووٹنگ جیتنے کے بعد ملک کی پہلی خاتون وزیرِاعظم بننے جارہی ہیں۔

سابق وزیراعظم شِنزو آبے کی قریبی ساتھی اور برطانوی رہنما مارگریٹ تھیچر کی مداح سمجھی جانے والی تاکائچی نے زیریں ایوان میں 237 ووٹ حاصل کیے، جو 465 نشستوں والے ایوان میں واضح اکثریت ہے۔ ان کی کامیابی جاپان کی سیاست میں طویل عرصے سے حاوی مردانہ غلبے کو چیلنج کرتی ہے اور ملک کو، جو امریکہ کا قریبی اتحادی ہے، سیاسی طور پر مزید دائیں بازو کی سمت لے جاتی ہے۔

تاکائچی کی کامیابی اس وقت سامنے آئی جب حکمران لبرل ڈیموکریٹک پارٹی (ایل ڈی پی) نے دائیں بازو کی جاپان انوویشن پارٹی کے ساتھ اتحاد کا معاہدہ کیا۔ توقع ہے کہ پارلیمنٹ کا کمزور بالا ایوان بھی ان کی منظوری دے گا، جس کے بعد وہ منگل کی شام جاپان کی 104ویں وزیرِاعظم کے طور پر حلف اٹھائیں گی۔ وہ موجودہ وزیرِاعظم شیگیرو اِشیبا کی جگہ سنبھالیں گی، جنہوں نے حالیہ انتخابی ناکامیوں کی ذمہ داری قبول کرتے ہوئے گزشتہ ماہ استعفیٰ دے دیا تھا۔

اگرچہ تاکائچی کی وزارتِ عظمیٰ جاپان میں خواتین کی سیاسی نمائندگی کے لحاظ سے تاریخی پیش رفت ہے، تاہم مبصرین کے مطابق یہ ترقی پسندی کی علامت نہیں بلکہ امیگریشن اور سماجی پالیسیوں پر سخت گیر مؤقف کی جانب جھکاؤ کی نشاندہی کرتی ہے۔ جاپان اس وقت مہنگائی اور عوامی غصے کے دور سے گزر رہا ہے، جس نے انتہائی دائیں بازو کی سانسےیتو پارٹی سمیت حزبِ اختلاف کی جماعتوں کے لیے حمایت میں اضافہ کیا ہے۔