امریلی اسٹیلز نے لیکویڈٹی میں بہتری کیلئے ماسٹر ری اسٹرکچرنگ ایگریمنٹ پر عملدرآمد مکمل کرلیا

امریلی اسٹیلز لمیٹڈ نے جمعرات کو اعلان کیا ہے کہ کمپنی نے ماسٹر ری اسٹرکچرنگ ایگریمنٹ (ایم آر اے)، متعلقہ دستاویزات، معاہدوں اور بینکنگ سنڈی کیٹس پر دستخط اور ان پر عملدرآمد مکمل کر لیا ہے۔

کمپنی نے یہ پیش رفت پاکستان اسٹاک ایکسچینج (پی ایس ایکس) کو ایک نوٹس کے ذریعے بتائی۔ کمپنی کے مطابق یہ معاہدہ بینک الفلاح لمیٹڈ کے ساتھ بطور لیڈ بینک اور پاک برونائی انویسٹمنٹ کمپنی لمیٹڈ کے ساتھ بطور ایجنٹ اور سیکیورٹی ایجنٹ کے طور پر طے پایا ہے۔

نوٹس میں کہا گیا کہ اس معاہدے پر عملدرآمد کمپنی کے لیے ایک اہم سنگِ میل ہے جو امریلی اسٹیلز اور اس کے مالیاتی شراکت داروں کے درمیان مشترکہ کوششوں کا نتیجہ ہے۔

کمپنی کے مطابق، ری اسٹرکچرنگ سے کئی اہم فوائد حاصل ہوں گے، جن میں لیکویڈیٹی اور کیش فلو میں بہتری، پائیدار آپریشنز، پیداواری صلاحیت کے بہتر استعمال، اور مالی و عملی اخراجات میں کمی شامل ہے۔

واضح رہے کہ گزشتہ ماہ بورڈ آف ڈائریکٹرز نے ری اسٹرکچرڈ فنانسنگ سہولتوں کی شرائط و ضوابط کو ٹرم شیٹ اور ماسٹر ری اسٹرکچرنگ ایگریمنٹ کے ذریعے منظور کیا تھا۔

امریلی اسٹیلز لمیٹڈ کو 1984 میں ایک پرائیویٹ لمیٹڈ کمپنی کے طور پر قائم کیا گیا تھا، جسے 2009 میں پبلک لمیٹڈ کمپنی میں تبدیل کر دیا گیا۔ کمپنی کا بنیادی کاروبار اسٹیل بارز اور بلیٹس کی تیاری اور فروخت ہے۔