پاکستان ڈیفالٹ رسک میں کمی کے لحاظ سے دنیا میں دوسرے نمبر پر آگیا ، خرم شہزاد

وزیرِ خزانہ کے مشیر خرم شہزاد نے کہا ہے کہ پاکستان نے گزشتہ پندرہ ماہ کے دوران اپنی معاشی کارکردگی میں نمایاں بہتری دکھاتے ہوئے دنیا کے اُن چند ممالک میں جگہ بنالی ہے جنہوں نے ڈیفالٹ کے خطرات میں سب سے زیادہ کمی ریکارڈ کی ہے۔

انہوں نے کہا کہ بلوم برگ کے تازہ اعداد و شمار کے مطابق پاکستان کو خودمختار ڈیفالٹ رسک میں کمی کے لحاظ سے دنیا کی دوسری سب سے بہتر کارکردگی دکھانے والی معیشت قرار دیا گیا ہے۔ رپورٹ کے مطابق یہ درجہ بندی کریڈٹ ڈیفالٹ سویپ (سی ڈی ایس) کے اندازے پر مبنی ہے، جو کسی ملک کے قرض ادا نہ کرنے کے خطرے کو ظاہر کرتی ہے۔

خرم شہزاد نے بتایا کہ جون 2024 سے ستمبر 2025 تک کے دوران پاکستان نے ڈیفالٹ رسک میں غیر معمولی کمی ریکارڈ کی، جس کے نتیجے میں ملک ترکی کے بعد دوسرے نمبر پر آگیا ہے۔ ان کے مطابق پاکستان واحد ایسا ملک ہے جس نے گزشتہ سال کے دوران ہر سہ ماہی میں مسلسل بہتری دکھائی اور ڈیفالٹ کے امکانات میں 2,200 بیسس پوائنٹس کی نمایاں کمی ہوئی۔

انہوں نے کہا کہ پاکستان کی یہ کارکردگی بڑے ابھرتے ہوئے ممالک جیسے جنوبی افریقہ اور ایل سلواڈور سے بھی بہتر رہی، جب کہ دوسری جانب ارجنٹینا، مصر اور نائجیریا جیسے ممالک میں ڈیفالٹ کے خطرات بڑھ گئے ہیں۔

خرم شہزاد کے مطابق ڈیفالٹ کے خدشات میں یہ نمایاں کمی سرمایہ کاروں کے اعتماد میں اضافے، معاشی استحکام، ساختی اصلاحات، قرضوں کی بروقت ادائیگی اور آئی ایم ایف پروگرام پر تسلسل سے عمل درآمد کا نتیجہ ہے۔ انہوں نے کہا کہ بین الاقوامی ریٹنگ ایجنسیوں (ایس اینڈ پی، فچ اور موڈیز) کی جانب سے پاکستان کی درجہ بندی میں مثبت تبدیلیاں بھی اس رجحان کی عکاسی کرتی ہیں۔

مشیرِ خزانہ نے کہا کہ پاکستان اب عالمی مالیاتی منڈیوں میں اپنی ساکھ بحال کر رہا ہے اور ابھرتی ہوئی معیشتوں میں ایک مضبوط اور مستحکم اصلاحی مثال کے طور پر سامنے آ رہا ہے۔