پاکستان نے خلیج اور چین کو جوڑنے والے پل کے کردار کیلئے جوائنٹ گروپ تشکیل دیدیا

پاکستان نے خود کو علاقائی لاجسٹکس اور ٹرانزٹ حب کے طور پر پیش کرنے کی کوششیں تیز کر دی ہیں۔ جمعہ کے روز وفاقی وزیر برائے بحری امور محمد جنید انور چوہدری نے ایک اعلیٰ سطح اجلاس کی صدارت کی جس میں مشرقِ وسطیٰ، وسطی ایشیا، چین اور دیگر خطوں کو جوڑنے والے ترجیحی انفراسٹرکچر منصوبوں کا نقشہ تیار کرنے پر غور کیا گیا۔

وفاقی وزیر نے بحری امور، مواصلات، ریلوے اور دفاعی وزارتوں پر مشتمل ایک جوائنٹ ورکنگ گروپ کے قیام کا اعلان کیا جو آئندہ ہفتے اپنے پہلے اجلاس میں قابلِ عمل منصوبوں کی فہرست مرتب کرے گا۔ انہوں نے اہم وزارتوں اور ریاستی اداروں کے سینئر حکام پر زور دیا کہ وہ فوری فنڈنگ کے لیے منصوبے تجویز کریں، ریگولیٹری اصلاحات پیش کریں اور تجارتی و ٹرانسپورٹ راہداریوں کو مضبوط بنائیں۔

اجلاس میں کراچی پورٹ، پورٹ قاسم اور گوادر پورٹ کو علاقائی ٹرانسپورٹ راہداریوں سے ریل، سڑک اور فضائی نیٹ ورکس کے ذریعے جوڑنے پر توجہ دی گئی۔ جنید انور چوہدری نے ایم ایل-ون ریلوے منصوبے کی اہمیت پر زور دیا جو خیبر پختونخوا سے جنوبی بندرگاہوں تک مال برداری اور مسافروں کی آمد و رفت میں اضافہ کرے گا۔ ان کا کہنا تھا کہ پاکستان کو اپنی ترقیاتی ترجیحات کو شراکت دار ممالک کی کنیکٹیویٹی ضروریات سے ہم آہنگ کرنا ہوگا۔

بحری امور کے ٹیکنیکل ایڈوائزر محمد جواد اختر نے سعودی عرب کے ساتھ نئے منصوبوں کی تجویز دی، جن میں کراچی–کے ایس اے اور گوادر–کے ایس اے گیٹ وے ٹرمینلز، پاکستان نیشنل شپنگ کارپوریشن کے بیڑے میں سعودی شراکت کے تحت توسیع، کراچی تا جدہ اور گوادر تا دمام براہِ راست شپنگ لائنز کا آغاز، اور گڈانی میں 20 گرین شپ ری سائیکلنگ یارڈز کا قیام شامل ہیں۔

دیگر وزارتوں نے اپنی ترجیحات بیان کیں۔ مواصلات کی وزارت نے ریلوے لائنوں کے ساتھ فائبر آپٹک کیبل بچھانے، سب میرین کیبل نیٹ ورک کے پھیلاؤ، کراچی سے سکھر کو جوڑنے والی ایم-سکس موٹر وے کی جلد تکمیل اور کیرتھر پہاڑوں سے گزرنے والی مجوزہ ایم- ٹین ایکسٹینشن پر زور دیا۔

پیٹرولیم وزارت کے نمائندے نے بتایا کہ حب میں ایک نئے مرچنٹ آئل ٹرمینل کے لیے 300 ملین ڈالر لاگت کی فزیبلٹی اسٹڈی جاری ہے، جو پاکستان اسٹیٹ آئل کی توسیعی حکمتِ عملی کا حصہ ہے۔

اجلاس کے اختتام پر جنید انور چوہدری نے وزارتوں پر زور دیا کہ وہ ایک ایسا سرمایہ کاری کے لیے تیار روڈمیپ فراہم کریں جو بین الاقوامی فنانسنگ حاصل کر سکے اور پاکستان کے کردار کو خلیج، وسطی ایشیا اور چین کو جوڑنے والے مرکزی پل کے طور پر مستحکم بنا سکے۔