درآمدات کو محدود کرنے کیلئے ڈیوٹیز عارضی اقدامات تھے، ایف بی آر

فیڈرل بورڈ آف ریونیو (ایف بی آر) نے اعلان کیا ہے کہ ریگولیٹری ڈیوٹیز اور ایڈیشنل کسٹمز ڈیوٹیز، جو ایس آر اوز کے ذریعے عائد کی گئی تھیں، عارضی اقدامات تھے جو بنیادی طور پر درآمدات کو محدود کرنے اور بگڑتے ہوئے کرنٹ اکاؤنٹ خسارے پر قابو پانے کے لیے متعارف کرائے گئے تھے۔

یہ انکشاف ایف بی آر کی سالانہ ٹیکس ایکسپنڈیچر رپورٹ 2025 میں کیا گیا۔

رپورٹ میں بتایا گیا کہ اگرچہ یہ اقدامات عارضی نوعیت کے تھے، تاہم ان ڈیوٹیز کے تحت دی گئی چھوٹ کو اس رپورٹ میں بینچ مارک ریٹس سے انحراف تصور کیا گیا ہے۔

کسٹمز ڈیوٹی (سی ڈی)، ریگولیٹری ڈیوٹی (آر ڈی) اور ایڈیشنل کسٹمز ڈیوٹی (اے سی ڈی) کی قانونی شرحوں کو اس تجزیے کے لیے بینچ مارک ریٹس کے طور پر مقرر کیا گیا ہے۔ رپورٹ کے مطابق کسٹمز سے متعلق چھوٹ اور مراعات عموماً مخصوص نوعیت کی ہوتی ہیں، جو اشیا یا خدمات کی نوعیت کے مطابق مختلف ہو سکتی ہیں۔

حساب کتاب کے عمل میں، قانونی شرحوں سے کسی بھی انحراف کو چھوٹ یا مراعات کے طور پر شمار کیا گیا ہے۔ یہ انحراف اس بات کی نشاندہی کرتا ہے کہ جہاں مؤثر ڈیوٹی ریٹ مقررہ بینچ مارک سے مختلف ہے، وہاں خصوصی سہولت یا رعایت دی گئی ہے۔

رپورٹ میں مزید کہا گیا ہے کہ کسٹمز اخراجات کے حساب کے لیے مالی سال 2023-24 کا عرصہ زیرِ غور رکھا گیا ہے۔ اس مدت کا انتخاب متعلقہ کسٹمز ڈیوٹیز اور ان کے سرکاری آمدنی و اخراجات پر اثرات کا جائزہ لینے کے لیے کیا گیا۔

کاپی رائٹ بزنس ریکارڈر، 2025