این بی پی ،یوبی ایل اور ایچ بی ایل اہم ملکی بینک قرار

اسٹیٹ بینک آف پاکستان نے سال 2025ء کے لیے ملک کے تین بڑے بینکوں کو ڈومیسٹک سسٹمیکلی امپورٹنٹ بینکس (DSIBs) کے طور پر نامزد کردیا ہے جن میں نیشنل بینک آف پاکستان، یونائیٹڈ بینک لمیٹڈ اور حبیب بینک لمیٹڈ شامل ہیں۔

اسٹیٹ بینک کے مطابق مقامی انتظامی لحاظ سے اہم بینکوں کی نامزدگی مالیاتی نظام کے استحکام اور بینکاری سیکٹر میں اعتماد کو مضبوط بنانے کے لیے کی جاتی ہے۔

یہ اقدام اسٹیٹ بینک کے ڈی ایس آئی بی فریم ورک کے تحت کیا گیا ہے جو بین الاقوامی معیارات سے ہم آہنگ ہےاس فریم ورک کے ذریعے ہر سال بینکوں کے مالیاتی نظام کا تفصیلی تجزیہ کیا جاتا ہے تاکہ یہ طے کیا جاسکے کہ کون سے بینک ملکی معیشت اور مالیاتی نظام کے لیے زیادہ اہمیت رکھتے ہیں۔

اس جائزے میں بینک کے سائز، مارکیٹ میں حصہ، پیچیدگی اور متبادل اداروں کی دستیابی جیسے عوامل شامل ہوتے ہیں اسٹیٹ بینک وضاحت کے مطابق نامزد بینکوں پر اضافی کیپیٹل برقرار رکھنے کی شرط عائد ہوگی جسکے تحت نیشنل بینک کو 2.5 فیصد جبکہ یونائیٹڈ بینک اور حبیب بینک کو 1.5 فیصد اضافی کامن ایکویٹی ٹئیر1 (سی ای ٹی1) کیپیٹل رکھنا ہوگاجو 31 مارچ 2026ء سے لاگو ہوگا۔

اسٹیٹ بینک نے کہا ہے کہ اس اقدام کا مقصد یہ یقینی بنانا ہے کہ کسی بھی ممکنہ مالیاتی بحران یا جھٹکے کی صورت میں بینکاری نظام محفوظ اور مستحکم رہےاس فیصلے سے نہ صرف مالیاتی ڈھانچے کو تقویت ملے گی بلکہ سرمایہ کاروں اور صارفین کا اعتماد بھی مزید بڑھے گا۔

کاپی رائٹ بزنس ریکارڈر 2025