ایس ای سی پی کا کارپوریٹ شعبے کی ترقی اور رسمی معیشت کے فروغ میں کلیدی کردار

سیکیورٹیز اینڈ ایکسچینج کمیشن آف پاکستان (ایس ای سی پی) پاکستان کے کارپوریٹ شعبے کو فروغ دینے میں ایک کلیدی کردار ادا کرتا رہا ہے جس میں کاروباری رجسٹریشن کے عمل کو آسان بنانا اور پائیدار اقتصادی ترقی کے اہم محرک کے طور پر کارپوریٹائزیشن کو فعال طور پر فروغ دینا شامل ہے۔

ایس ای سی پی نے مختلف اسٹیک ہولڈرز کے ساتھ اپنے عزم برائے رسمی معیشت اور جامع ترقی کے تحت اسٹریٹجک تعاون کا آغاز کردیا ہے، ان میں سرکاری وزارتیں، ریگولیٹری ادارے، اسٹیٹ بینک آف پاکستان،لینڈ اتھارٹیز، بجلی کی تقسیم کار کمپنیاں، چیمبرز آف کامرس اور ڈیجیٹل بینکنگ پلیٹ فارمز جیسے ایزی پیسہ اور جاز کیش شامل ہیں۔

کاروبار کی رجسٹریشن کے لیے زیادہ سازگار ماحول پیدا کرنے کی غرض سے ان اداروں کو باضابطہ خطوط جاری کیے گئے ہیں۔

کمیشن کے مطابق یہ تعاون رسمی شعبے کی ترقی کے لیے کیا جا رہا ہے تاکہ پارٹنر ادارے ایس ای سی پی کے ساتھ رجسٹرڈ کمپنیوں کو ترجیح دیں، اسکے ساتھ کارپوریٹائزیشن کے فائدے بھی اجاگر کیے گئے ہیں، جیسے ذمہ داری سے تحفظ، اچھی ساکھ، کاروبار کو بڑھانے کے بہتر مواقع، سرمایہ حاصل کرنے میں آسانی، مستقل حیثیت، بہتر نظم و نسق، ٹیکس میں سہولت، ملکیت کی منتقلی میں آسانی اور برانڈ کا تحفظ شامل ہے۔

علاوہ ازیں ایس ای سی پی کے تحت کام کرنے والی کمپنیوں کو ریگولیٹری نگرانی اور قانونی تقاضوں کی پابندی کے فوائد حاصل ہوتے ہیں، جو ان کی ساکھ کو بہتر بناتے ہیں، خرید و فروخت سے متعلقہ خدشات کو کم کرتے ہیں اور معاہدوں پر عملدرآمد کو یقینی بناتے ہیں۔

یہ مشترکہ طریقہ ایک شفاف، قابلِ نگرانی اور مؤثر معیشت کے فروغ میں مدد دیتا ہے،اس مشترکہ اقدام کو مضبوط کرنے کے لیے ایک عوامی آگاہی مہم شروع کی گئی ہے جس میں سیمینارز،ورکشاپس اور ڈیجیٹل میڈیا کے ذریعے لوگوں کو شامل کیا جا رہا ہے۔

اس مہم کا مقصد غیر رسمی شعبے کے اداروں کو مذکورہ اسٹیک ہولڈرز کے ذریعے شامل کرنا اور ایس ای سی پی کے ڈیجیٹل اور آسان کاروباری رجسٹریشن عمل کے بارے میں آگاہی دینا ہے ۔

کاپی رائٹ بزنس ریکارڈر 2025