اے آئی پر مبنی رسک مینجمنٹ سسٹم جلد فعال کرانے کا فیصلہ

پاکستان اپنے کسٹمز کلیئرنس عمل میں اے آئی پر مبنی رسک مینجمنٹ سسٹمز متعارف کرانے جا رہا ہے جو حکومت کی وسیع اصلاحات کے تحت محصول بڑھانے اور تجارت کو آسان بنانے کے اقدامات کا حصہ ہے۔

یہ پیشرفت منگل کو کسٹمز انسپکشن اور فیس لیس نظام کے جائزہ اجلاس کے دوران سامنے آئی۔

اجلاس کی صدارت کرتے ہوئے وزیراعظم شہباز شریف نے کسٹمز کی جانچ پڑتال اورجائزہ نظام کو جدید ٹیکنالوجی سے ہم آہنگ اور فیس لیس کر کے شفافیت یقینی بنانے کی ہدایت کی ہے۔

وزیراعظم نے کہا کہ کسٹم کے نظام کی بہتری اور جدت کا مقصد برآمدات اور درآمدات سے منسلک کاروباری افراد کو سہولت بہم پہنچانے کے ساتھ ملکی محاصل میں اضافہ کرنا ہے۔

انہوں نے کہا کہ کسٹم جانچ پڑتال اور جائزہ نظام کیلئے انتظامی کارروائیوں میں درکار وقت کو کم سے کم کیا جائے۔ وزیراعظم شہباز شریف نے حکام کو ہدایت دی کہ کسٹمز اسیسمنٹ پر تاجروں کی جانب سے دائر کی جانے والی نظرثانی کی اپیلوں کی سماعت کے لیے غیر جانبدار افسران کی خدمات حاصل کی جائیں۔

شہباز شریف نے کہا کہ بندرگاہوں پر بڑھتی ہوئی نقل و حمل اور اسکی جلد از جلد ترسیل کے لئے منظم منصوبہ بندی کی جائے تاکہ سامان جلد از جلد بندرگاہ سے اپنی منزل کی جانب رواں دواں ہو۔

وزیراعظم نے کسٹمز حکام اور تمام متعلقہ اداروں کو اصلاحات کے بروقت، مکمل اور مؤثر نفاذ کے لیے ہدایات جاری کیں۔ انہوں نے کسٹمز سسٹم میں شفافیت، ٹیکس وصولی میں اضافہ اور تاجروں کی سہولت جیسے اہم پہلوؤں کے لیے تمام ضروری اقدامات کرنے کی ہدایت دی۔

وزیراعظم نے کہا کہ معاشی اور تجارتی اصلاحات کے ذریعے کاروبار اور سرمایہ کاری میں اضافہ کرنا حکومت کی اولین ترجیحات میں شامل ہے۔

اجلاس کے دوران وزیراعظم کو کسٹمز انسپکشن اور اسیسمنٹ میں اب تک کیے گئے اقدامات سے آگاہ کیا گیا۔

انہیں بتایا گیا کہ جلد ہی اے آئی پر مبنی رسک مینجمنٹ سسٹم بھی فعال کردیا جائے گا۔

اجلاس کو بتایا گیا کہ کسٹم کے اسکینرز کے ذریعے جانچ پڑتال میں مصنوعی ذہانت کے استعمال سے کسٹم کلیئرنس میں درکار وقت میں کمی آرہی ہے۔

معلوم ہوا کہ حکومت کی مؤثر اسمگلنگ مخالف کارروائیوں نے غیر قانونی طور پر سامان کی نقل و حرکت کو نمایاں طور پر کم کر دیا ہے اور قانونی نظام کے ذریعے کلیئر کیے جانے والے سامان کی تعداد میں اضافہ ہوا ہے۔