اسٹاک ایکسچینج میں نئی تاریخ رقم، معاشی صورتحال میں مستقل بہتری کے نتائج سامنے آ رہے، وزیرِ اعظم

وزیراعظم شہباز شریف نے پاکستان اسٹاک ایکسچینج میں ہنڈرڈ انڈیکس 1 لاکھ 50 ہزارپوائنٹس کی تاریخی سطح عبور کرنے پر اطمینان کا اظہارکیا اور کاروباری برادری کے حکومتی پالیسیوں پر اعتماد کا شکریہ ادا کرتے ہوئے کہا کہ اللہ کے فضل و کرم سے معیشت کی بہتری کی بدولت سرمایہ کاروں اور تاجر برادری کا اعتماد بحال ہوگیا۔

ایک بیان میں وزیرِاعظم نے کاروباری برادری کا حکومت کی پالیسیوں پر مسلسل اعتماد کرنے پر شکریہ ادا کیا۔

انہوں نے اس سنگِ میل کو ملکی معاشی حالات میں بتدریج بہتری کا نتیجہ قرار دیتے ہوئے کہا کہ سرمایہ کاروں اور تاجروں نے اپنی ثابت قدمی سے پاکستان کی منڈی پر اعتماد بحال کیا ہے۔

شہباز شریف نے کہا کہ قوم ترقی کی راہ پر گامزن ہے لیکن مزید کوششوں کی ضرورت ہے۔ انہوں نے اس موقع پر حکومت کی معاشی ٹیم کے جاری عزم کو اجاگر کیا۔

وزیراعظم نے کہا کہ ملک ترقی کی جانب گامزن ہے ، مگر مزید محنت درکار ہے ۔ معاشی ٹیم نے شب و روز محنت سے معیشت کو مشکلات سے نکالا۔ سرمایہ کاروں و تاجر برادری نے مشکل وقت میں بھی پاکستان میں معاشی سرگرمیاں جاری رکھیں، جو قابل تحسین ہے ،ملک میں کاروبار کی ترقی و سرمایہ کاری میں اضافے سے روزگار کے مواقع پیدا ہونگے ۔