پاکستانی فارماسیوٹیکل شعبے کی عالمی سطح پر پذیرائی، ہیلیون کا 1.20 کروڑ ڈالر کی سرمایہ کاری کا اعلان

پاکستان کا فارماسیوٹیکل شعبہ اسپیشل انویسٹمنٹ فسیلیٹیشن کونسل (ایس آئی ایف سی) کی معاونت کے باعث عالمی سطح پر پذیرائی حاصل کررہا ہے۔

کنزیومر ہیلتھ کے عالمی رہنما ہیلیون (Haleon) نے پاکستان میں 1 کروڑ 20 لاکھ ڈالر کی سرمایہ کاری کا اعلان کیا ہے۔ کمپنی کا مقصد اپنی پیداواری صلاحیت میں اضافہ کرنا اور ملک میں پیناڈول کی بڑھتی ہوئی طلب کو پورا کرنے کے لیے اس کی تیاری کو وسعت دینا ہے۔

یہ بھی قابلِ ذکر ہے کہ ایس آئی ایف سی کی معاونت کے باعث پاکستان کی فارماسیوٹیکل برآمدات میں اضافہ دیکھنے میں آیا ہے جو رواں مالی سال 457 ملین امریکی ڈالر تک پہنچ گئی ہیں۔

دستیاب اعدادوشمار کے مطابق علاج معالجے سے متعلق مصنوعات بشمول فارما، سرجیکل، غذائی سپلیمنٹس اور میڈیکل ڈیوائسز کی برآمدات 909 ملین ڈالر کی ریکارڈ سطح پر پہنچ گئی ہیں۔

پاکستان فارما مینوفیکچررز ایسوسی ایشن کے ذرائع کے مطابق حکومت کی معقول قیمتوں کی پالیسی کے باعث رواں مالی سال فارما کی برآمدات میں بھی 34 فیصد اضافہ ریکارڈ کیا گیا ہے۔

ذرائع نے مزید بتایا کہ قیمتوں کے تعین کی آزادی (پرائس ڈی ریگولیشن) کی پالیسی بین الاقوامی معیارات کے مطابق ہے جس کے نتیجے میں سرمایہ کاری اور پیداوار میں نمایاں اضافہ ہوا ہے۔

یہ بھی قابلِ ذکر ہے کہ افغانستان، فلپائن، سری لنکا، ازبکستان اور عراق پاکستانی ادویات کے بڑے خریداروں میں شامل ہیں جبکہ کینیا، ویتنام، میانمار اور تھائی لینڈ بھی ان ممالک میں شامل ہیں جہاں پاکستانی ادویات کی برآمدات میں نمایاں اضافہ ممکن ہے۔

ذرائع کا دعویٰ ہے کہ پاکستانی فارماسیوٹیکل برآمدات سال 2030 تک عالمی مارکیٹ میں 1.5 ارب ڈالر تک پہنچ جائیں گی۔

کاپی رائٹ بزنس ریکارڈر 2025