’فی الحال ٹرمپ کا دورہ پاکستان طے نہیں‘ وائٹ ہاؤس کی وضاحت

وائٹ ہاؤس نے جمعرات کے روز واضح کیا ہے کہ فی الحال امریکی صدر ڈونلڈ ٹرمپ کا پاکستان کا کوئی دورہ شیڈول نہیں ہے۔ یہ بات خبر رساں ادارے رائٹرز نے اپنی ایک رپورٹ میں بتائی ہے۔

رپورٹ کے مطابق یہ وضاحت اس وقت سامنے آئی جب دن کے آغاز میں ایک مقامی میڈیا رپورٹ نے ذرائع کے حوالے سے دعویٰ کیا تھا کہ امریکی صدر 18 ستمبر 2025 کو پاکستان کا دورہ کریں گے۔

قبل ازیں دفتر خارجہ کے ترجمان شفقت علی خان نے جمعرات کے روز کہا ہے کہ انہیں امریکی صدر ڈونلڈ ٹرمپ کے پاکستان کے دورے سے متعلق کسی اطلاع کا علم نہیں۔

یہ بیان انہوں نے اُس وقت دیا جب خبر رساں ادارے رائٹرز نے ان سے ایک مقامی میڈیا رپورٹ کی تصدیق کے لیے سوال کیا، جس میں ذرائع کے حوالے سے دعویٰ کیا گیا تھا کہ صدر ٹرمپ رواں سال ستمبر میں اسلام آباد کا دورہ کریں گے۔

مقامی نیوز چینلز نے باخبر ذرائع کا حوالہ دیتے ہوئے مزید کہا کہ صدر ٹرمپ ستمبر میں اسلام آباد پہنچنے کے بعد بھارت کا بھی دورہ کریں گے۔

دوسری جانب، امریکی صدر نے بادشاہ چارلس سوم کی جانب سے ملکہ کمیلا کے ساتھ ایک اور سرکاری دورے کی دعوت قبول کر لی ہے، جو کہ ایک غیر معمولی پیش رفت ہے اور اس کی تصدیق بکنگھم پیلس نے کر دی ہے۔

بکنگھم پیلس کے مطابق، صدر ٹرمپ اپنی اہلیہ میلانیا ٹرمپ کے ہمراہ 17 سے 19 ستمبر تک دورہ کریں گے، اور انہیں ونڈسر کاسل میں میزبانی فراہم کی جائے گی۔

یہ صدر ٹرمپ کا برطانیہ کا دوسرا سرکاری دورہ ہو گا۔ اس سے قبل وہ 2019 میں اپنے پہلے دورِ صدارت کے دوران ملکہ الزبتھ دوم کی دعوت پر سرکاری دورے پر برطانیہ آئے تھے۔

صدر ٹرمپ اور آرمی چیف عاصم منیر کی ملاقات

امریکہ اور پاکستان کے تعلقات میں اُس وقت غیر معمولی بہتری دیکھی گئی جب گزشتہ ماہ پاکستانی آرمی چیف فیلڈ مارشل عاصم منیر نے وائٹ ہاؤس میں صدر ٹرمپ سے ملاقات کی۔

فیلڈ مارشل عاصم منیر اور صدر ٹرمپ کے درمیان یہ اعلیٰ سطح ملاقات کابینہ روم میں ظہرانے سے شروع ہوئی اور پھر اوول آفس تک جاری رہی۔

آئی ایس پی آر کے مطابق، اس ملاقات میں صدر ٹرمپ کے ہمراہ امریکی وزیر خارجہ سینیٹر مارکو روبیو اور مشرق وسطیٰ کے لیے امریکی خصوصی نمائندے اسٹیو وٹکوف بھی موجود تھے، جب کہ فیلڈ مارشل عاصم منیر کے ہمراہ پاکستان کے قومی سلامتی کے مشیر شریک تھے۔

ملاقات کے دوران آرمی چیف نے حالیہ علاقائی بحران میں پاکستان اور بھارت کے درمیان جنگ بندی کے لیے صدر ٹرمپ کے تعمیری اور نتیجہ خیز کردار پر پاکستانی حکومت اور عوام کی جانب سے گہری قدردانی کا اظہار کیا۔

فیلڈ مارشل عاصم منیر نے عالمی چیلنجز کو سمجھنے اور حل کرنے کی صدر ٹرمپ کی قائدانہ صلاحیت کو سراہا۔

صدر ٹرمپ نے پاکستان کی علاقائی امن و استحکام کے لیے کوششوں کی تعریف کی اور دہشت گردی کے خلاف مضبوط دوطرفہ تعاون کو سراہا۔ دونوں رہنماؤں نے انسداد دہشت گردی کے میدان میں تعاون جاری رکھنے کے عزم کا اعادہ کیا۔