وفاقی کابینہ نے ای او بی آئی پنشن میں 15 فیصد اضافے کی منظوری دیدی

وفاقی کابینہ نے بدھ کے روز ایمپلائیز اولڈ ایج بینیفٹس انسٹیٹیوشن (ای او بی آئی) کی پنشن میں 15 فیصد اضافے کی منظوری دے دی۔

یہ فیصلہ آج وزیراعظم شہباز شریف کی زیر صدارت ہونے والے وفاقی کابینہ کے اجلاس میں کیا گیا۔

ای او بی آئی پنشن میں یہ اضافہ جنوری 2025 سے نافذ العمل ہوگا۔

کابینہ نے یہ منظوری اوورسیز پاکستانیوں اور انسانی وسائل کی ترقی کی وزارت کی سفارش پر دی، جو اس اضافے کے نفاذ کی ذمہ دار ہو گی۔

اجلاس کے دوران وزیراعظم نے ای او بی آئی میں ادارہ جاتی اصلاحات کے لیے کابینہ کمیٹی تشکیل دینے کی ہدایت بھی دی۔

یہ کمیٹی ادارے میں اصلاحات کے ساتھ ساتھ غیر رسمی مزدور طبقے جیسے گھریلو ملازمین، کھیتوں میں کام کرنے والے مزدوروں اور دیگر شعبوں میں کام کرنے والے افراد کے لیے بڑھاپے کے فائدے کی اسکیموں کی تجاویز کا جائزہ لے گی، جنہیں اب تک نظرانداز کیا گیا ہے۔

اس کے علاوہ، قومی صحت کی وزارت کی سفارش پر کابینہ نے کینسر، امراضِ قلب، اور دیگر جان بچانے والی ادویات کی اسپتالوں اور متعلقہ طبی اداروں کے لیے درآمد پر مزید پانچ سال کی چھوٹ کی منظوری دی۔

یہ ادویات صرف اسپتالوں اور متعلقہ اداروں میں دستیاب ہوں گی، ان کی اوپن مارکیٹ میں فروخت ممنوع ہو گی، اور ان کی درآمد کے لیے لائسنسنگ اتھارٹی سے پیشگی منظوری لینا لازمی ہوگا۔