ڈسکوز کی نجکاری، اتفاق رائے کے لیے ورکنگ گروپ تشکیل

حکومت نے بجلی کی تقسیم کار کمپنیوں (ڈسکوز) کی نجکاری کے عمل پر مشاورت اور اتفاق رائے کے لیے ایک ورکنگ گروپ تشکیل دیا ہے جو متعلقہ اسٹیک ہولڈرز اور مالیاتی مشیروں کے ساتھ رابطہ کر کے اتفاق رائے پیدا کرے گا۔ یہ بات باخبر ذرائع نے بزنس ریکارڈر کو بتائی۔

پہلے مرحلے میں حکومت تین ڈسکوز — اسلام آباد الیکٹرک سپلائی کمپنی (آئیسکو)، گوجرانوالہ الیکٹرک پاور کمپنی (گیپکو) اور فیصل آباد الیکٹرک سپلائی کمپنی (فیسکو) — کی نجکاری کا عمل تیز رفتاری سے مکمل کرنا چاہتی ہے تاکہ سال 2025 کے اختتام تک اس عمل کو پایہ تکمیل تک پہنچایا جا سکے۔ مالیاتی مشیرایلوریز اینڈ مارشل مڈل ایسٹ نے اس شعبے کی ڈیوی ڈیلیجنس رپورٹ حکومت کو فراہم کر دی ہے۔

تشکیل دیے گئے ورکنگ گروپ میں پرائیویٹائزیشن کمیشن کے کنسلٹنٹ عبدالباسط عباسی (کنوینر)، نیپرا کے ڈائریکٹر جنرل ساجد اکرم، انڈیپنڈنٹ سسٹم اینڈ مارکیٹ آپریٹر (آئی ایس ایم او) کے عمر ہارون، سی پی پی اے-جی کے سینئر مینیجر عمیر، نیپرا کے ڈائریکٹر سلمان رحمان، ایس ای سی پی کے ایڈیشنل جوائنٹ ڈائریکٹر عبدالمعیز خواجہ، پاور ڈویژن کے کنسلٹنٹ، پاور پلاننگ اینڈ مانیٹرنگ کمپنی، سی پی پی اے-جی، نیپرا اور متعلقہ ڈسکوز کے نمائندگان شامل ہیں۔

ورکنگ گروپ کی پہلی میٹنگ 26 جولائی 2025 کو وزارتِ نجکاری میں منعقد ہوگی۔

ورکنگ گروپ کو پرائیویٹائزیشن کمیشن آرڈیننس 2000 کی شق 5( ایف)، 5( جی)، اور 5( ٹی) کے تحت تشکیل دیا گیا ہے، تاکہ مالیاتی مشیر کی جانب سے نشاندہی کی گئی اہم امور کو حل کیا جا سکے جو کہ حکومت کی ملکیتی ڈسکوز کی نجکاری کے لیے ضروری ہیں۔ اس کا مقصد نجکاری کے عمل سے قبل وہ پالیسی، ریگولیٹری یا انتظامی فیصلے تیار کرنا ہے جو وفاقی حکومت کو کرنا ہوں گے۔

ورکنگ گروپ درج ذیل امور پر سفارشات تیار کرے گا: ریٹیل اور وائر کاروبار کی علیحدگی سے متعلق معاملات، جن میں لائسنسنگ، ڈسپیچ اور سیٹلمنٹ کے طریقہ کار، موزوں ٹیرف اور سبسڈی نظام شامل ہیں۔ اس کے علاوہ، رہائشی سوسائٹیوں اور صنعتی زونز سے متعلق قانونی اور تکنیکی مسائل کا جائزہ اور ان کے ڈسکوز کی قدر اور کارکردگی پر اثرات کا تجزیہ شامل ہوگا۔ مزید یہ کہ، نیپرا کی جانب سے تقسیم اور فراہمی کے کاروبار کو علیحدہ کرنے پر غور اور دیگر متعلقہ امور پر بھی کام کیا جائے گا۔

ورکنگ گروپ، یکساں ٹیرف اور صنعتی شعبے کو دی جانے والی کراس سبسڈی کے اثرات کا بھی جائزہ لے گا اور ڈسکوز کی مالیت پر ان کے اثرات سے متعلق سفارشات مرتب کرے گا۔

ملٹی ایئر ٹیرف (ایم وائے ٹی) فریم ورک کا جائزہ بھی ورکنگ گروپ کی ذمہ داریوں میں شامل ہوگا، جس میں یہ طے کیا جائے گا کہ آیا موجودہ ٹیرف میکانزم میں ترمیم کی ضرورت ہے یا نہیں، اور یہ بھی دیکھا جائے گا کہ نجکاری کے وقت ایم وائے ٹی میں تبدیلی کی گنجائش موجود ہے یا نہیں۔

ورکنگ گروپ سپلائر آف لاسٹ ریزورٹ (ایس او ایل آر) کے لائسنسنگ سے متعلق امور پر بھی غور کرے گا، خاص طور پر مقابلے کی بنیاد پر سپلائر لائسنس جاری کرنے کے فوائد و نقصانات اور ممکنہ سرمایہ کاروں کے نقطہ نظر سے۔

ورکنگ گروپ بجلی کی موجودہ تھوک (ہول سیل) مارکیٹ سے ریٹیل مارکیٹ میں منتقلی کے عمل کا بھی جائزہ لے گا، جس میں اگلے پانچ سالوں کے دوران بجلی کی مقدار، الاٹمنٹ کا طریقہ، سالانہ تقسیم، نیلامی کا طریقہ کار، اور ریگولیٹری منظوریوں جیسے امور شامل ہوں گے۔

نجکاری کے بعد سرمایہ کاری، کارکردگی میں بہتری اور سروس ڈلیوری میں بہتری کے لیے ایک مؤثر نظام بھی تجویز کیا جائے گا، تاکہ سرمایہ کاروں سے انفراسٹرکچر اور کارکردگی کے وعدے لیے جا سکیں۔ اس نظام میں قانونی عملداری، ریگولیٹری نگرانی، سرمایہ کاروں کے اعتماد، اور خطرات کی منصفانہ تقسیم جیسے عوامل کو بھی مدِنظر رکھا جائے گا۔

کاپی رائٹ بزنس ریکارڈر، 2025