روس کا یوکرین پر ڈرون اور میزائل حملہ، دو افراد ہلاک

روس نے یوکرین پر ڈرونز اور میزائلوں سے ایک اور حملہ کردیا ہے جس میں ملک کے مغربی علاقوں کو نشانہ بنایا گیا جب کہ رومانیہ کی سرحد سے متصل شہر چیرنیفتسی میں کم از کم دو افراد مارے گئے۔

یوکرینی وزیر خارجہ آندری سبیہا کے مطابق، روسی حملوں سے مغربی یوکرین کے شہر لویو، لٹسک اور چیرنیفتسی سب سے زیادہ متاثر ہوئے، جب کہ یوکرین کے دیگر علاقوں کو بھی نشانہ بنایا گیا۔

آندری سبیہا نے ایکس پر جاری بیان میں کہا کہ روس اپنی دہشت گردی کو مسلسل بڑھا رہا ہے، سینکڑوں ڈرونز اور میزائلوں سے ایک اور شدید حملہ کیا گیا، جس سے رہائشی علاقوں کو نقصان پہنچا اور عام شہری ہلاک و زخمی ہوئے۔یہ بیان انہوں نے ماسکو کے خلاف مزید سخت پابندیوں کا مطالبہ دہراتے ہوئے دیا۔

روس کی جنگی مشین روزانہ دہشت پھیلانے والے سینکڑوں ہتھیار تیار کر رہی ہے، جس کا دائرہ صرف یوکرین تک محدود نہیں بلکہ یہ پوری ٹرانس اٹلانٹک برادری کے لیے ایک سنگین خطرہ بن چکا ہے۔

چیرنیفتسکی علاقے کے گورنر، روسلان زاپارانیوک نے بتایا کہ روسی ڈرونز اور ایک میزائل کے حملے میں دو افراد ہلاک اور 14 زخمی ہوئے۔ یہ حملہ اس شہر پر کیا گیا جو یوکرین کی رومانیہ کے ساتھ سرحد سے تقریباً 40 کلومیٹر (24 میل) کے فاصلے پر واقع ہے۔ علاقائی حکام کے مطابق، شہر بھر میں کئی مقامات پر آگ بھڑک اٹھی جب کہ رہائشی مکانات اور انتظامی عمارتوں کو بھی نقصان پہنچا۔

میئر آندری سادووئی نے بتایا کہ یوکرین کے شہر لویو میں، جو پولینڈ کی سرحد کے قریب واقع ہے، حملے کے نتیجے میں 46 رہائشی مکانات، ایک یونیورسٹی کی عمارت، شہر کی عدالتیں، اور چھوٹے و درمیانے درجے کے کاروبار پر مشتمل تقریباً 20 عمارتیں متاثر ہوئیں۔