وزیر خارجہ اسحاق ڈار کی آسیان فورم میں عالمی رہنماؤں سے اہم ملاقاتیں

نائب وزیراعظم اور وزیر خارجہ سینیٹر محمد اسحاق ڈار نے جمعہ کے روز ملائیشیا کے شہر پتراجایہ میں منعقدہ 32ویں آسیان ریجنل فورم (اے آر ایف) وزارتی اجلاس کے موقع پر مختلف عالمی رہنماؤں سے ملاقاتیں کیں، جن میں ملائیشیا کے وزیراعظم انور ابراہیم، ترکی کے وزیر خارجہ حکان فیدان اور برطانیہ کے وزیر خارجہ ڈیوڈ لیمی شامل تھے۔

اسحاق ڈار نے وزیراعظم انور ابراہیم سے ملاقات میں وزیراعظم شہباز شریف کی جانب سے نیک خواہشات کا پیغام پہنچایا اور پاکستان کی جانب سے ملائیشیا کے ساتھ دو طرفہ تعلقات کو مزید مستحکم بنانے کے عزم کا اعادہ کیا۔

وزیراعظم انور ابراہیم نے بھی اسی گرمجوشی سے جواب دیتے ہوئے کہا کہ وہ اکتوبر 2025 میں وزیراعظم شہباز شریف کے متوقع دورے کے منتظر ہیں۔

اسحاق ڈار نے ملائیشیا کی آسیان چیئرمین شپ 2025 کے لیے قیادت کو سراہا اور 32ویں اے آر ایف اجلاس کے لیے شاندار انتظامات اور مہمان نوازی پر شکریہ ادا کیا۔ انہوں نے اکتوبر 2024 میں انور ابراہیم کے پاکستان کے دورے کے بعد تجارتی و سرمایہ کاری میں عملی پیشرفت پر بھی خوشی کا اظہار کیا۔

ملائیشین وزیراعظم نے ایک سوشل میڈیا پوسٹ میں کہا کہ وزیراعظم شہباز شریف کے آئندہ دورے کے دوران کئی مفاہمتی یادداشتوں (ایم او یوز) پر دستخط کی توقع ہے، جو دونوں ممالک کے گہرے تعلقات کا مظہر ہیں۔

انہوں نے بتایا کہ 2023 میں ملائیشیا-پاکستان تجارت میں 25 فیصد سے زائد اضافہ ہوا، جو 1.76 ارب امریکی ڈالر تک پہنچ گئی۔ ہم نے ملائیشیا-پاکستان کلوزر اکنامک پارٹنرشپ ایگریمنٹ کو حتمی شکل دینے کے عزم کا اعادہ کیا، حلال گوشت کی برآمدات میں وسعت اور قیمتوں کے حوالے سے مسابقت کو زیر غور لایا، اور چاول کی تجارت سمیت زراعت کے شعبے میں نئے مواقع تلاش کیے۔

وزیراعظم انور ابراہیم نے بتایا کہ انہوں نے وزیر خارجہ اسحاق ڈار سے علاقائی اور عالمی امور پر گفتگو کی، جن میں پاکستان-آسیان تعلقات اور مسئلہ کشمیر بھی شامل تھا۔

انہوں نے کہا کہ ملائیشیا، اقوام متحدہ کی قراردادوں کے مطابق، مسئلہ کشمیر کے پرامن حل کی حمایت جاری رکھے گا۔

انہوں نے پاکستان اور آسیان کے درمیان مستقبل میں مزید گہرے روابط کی امید بھی ظاہر کی۔

برطانیہ کے وزیر خارجہ ڈیوڈ لیمی سے ملاقات میں اسحاق ڈار نے پاکستان اور برطانیہ کے درمیان دو طرفہ تعلقات کی مثبت پیشرفت کا جائزہ لیا اور اس شراکت داری کو مزید مضبوط بنانے کے عزم کا اظہار کیا۔ انہوں نے بھارت-پاکستان کشیدگی کے دوران برطانیہ کے تعمیری کردار کو بھی سراہا۔

ترک وزیر خارجہ حکان فیدان کے ساتھ ملاقات میں دونوں رہنماؤں نے پاکستان اور ترکی کے دیرینہ تعلقات کا اعادہ کیا اور انہیں مزید مستحکم کرنے کے عزم کا اظہار کیا۔

یورپی یونین کی خارجہ امور کی سربراہ اور یورپی کمیشن کی نائب صدر کایا کالاس نے ایک گالا ڈنر کے دوران وزیر خارجہ اسحاق ڈار سے غیر رسمی ملاقات کی۔ پاکستانی سفارتخانے کے مطابق دونوں کے درمیان باہمی دلچسپی کے امور پر کھل کر تبادلہ خیال ہوا۔