ڈالر کے مقابلے میں روپے کی قدر میں کمی

انٹربینک مارکیٹ میں منگل کے کاروباری روز امریکی ڈالر کے مقابلے میں پاکستانی روپے کی قدر میں 0.08 فیصد کی کمی ریکارڈ کی گئی ہے۔

کاروباری روز کے اختتام پر ڈالر کے مقابلے میں قدر میں 24 پیسے کمی کے بعد روپیہ 283.41 روپے پر بند ہوا۔

یاد رہے کہ پیر کے روز روپیہ 283.17 پر بند ہوا تھا۔

عالمی منڈی میں امریکی ڈالر کی قدر میں معمولی اضافہ دیکھنے میں آیا، اگرچہ زیادہ تر کرنسیاں محدود دائرے میں ہی رہیں۔ سرمایہ کار مشرق وسطیٰ میں جاری کشیدگی کے باعث پریشان ہیں اور آئندہ دنوں میں مختلف مرکزی بینکوں کی پالیسیوں کے فیصلوں کے منتظر ہیں۔

بینک آف جاپان منگل کو اپنے دو روزہ مالیاتی پالیسی اجلاس کا اختتام کرے گا جہاں توقع کی جا رہی ہے کہ سود کی شرح کو برقرار رکھا جائے گا اور اگلے مالی سال سے بانڈ خریداری میں کمی کی رفتار سست کرنے پر غور کیا جائے گا۔

اس فیصلے سے قبل جاپانی ین کی قدر کچھ حدتک بڑھ کر 144.70 فی ڈالر ہو گئی، جس سے پچھلے سیشن میں ہونے والی کچھ کمی کی تلافی ہوئی۔

وسیع تر مارکیٹ میں مشرق وسطیٰ کی کشیدگی کے باعث سرمایہ کار محتاط ہو گئے، جس کی وجہ سے امریکی ڈالر نے عام طور پر خطرے سے بچنے کے رجحان کے تحت اپنی قیمت میں کچھ اضافہ کیا۔

وائٹ ہاؤس نے پیر کو اعلان کیا کہ سابق صدر ڈونلڈ ٹرمپ مشرق وسطیٰ کی صورتحال کے پیش نظر کینیڈا میں ہونے والی جی سیون کانفرنس سے ایک دن پہلے روانہ ہو رہے ہیں، اور انہوں نے نیشنل سیکورٹی کونسل کو ہدایت کی ہے کہ وہ صورتحال روم میں الرٹ رہے۔

ٹرمپ اس سے قبل تہران سے فوری انخلا کی اپیل کر چکے ہیں اور ایک بار پھر زور دیا کہ ایران کو امریکہ کے ساتھ جوہری معاہدہ کر لینا چاہیے تھا۔

ڈالر انڈیکس (جو ڈالر کو چھ بڑی کرنسیوں کے مقابلے میں ماپتا ہے) معمولی بہتری کے ساتھ 98.23 پر پہنچ گیا۔