صدر مملکت اور وزیراعظم کی قوم کو عیدالاضحیٰ کی مبارکباد

صدر آصف علی زرداری اور وزیر اعظم شہباز شریف نے عیدالاضحیٰ کے موقع پر پوری قوم اور دنیا بھر کی مسلم اُمہ کو دلی مبارکباد پیش کی۔

عیدالاضحیٰ کا دن مساجد میں مسلم اُمہ کی فلاح و بہبود اور ملکی سلامتی، خوشحالی اور ترقی کے لیے پرخلوص دعاؤں کے ساتھ طلوع ہوا۔

ملک بھر کے تمام شہروں، قصبوں اور دیہاتوں میں مساجد اور عیدگاہوں میں عید کی نماز کے اجتماعات منعقد کیے گئے۔

ریڈیو پاکستان کے مطابق صدر مملکت آصف علی زرداری نے عیدالاضحیٰ کے مبارک موقع پر پوری پاکستانی قوم اور عالم ِاسلام کو دلی مبارکباد پیش کی اور کہا کہ عید الاضحٰی ہمارے ایمان، قربانی، ایثار اور بھائی چارے کے جذبے کو ازسرِنو زندہ کرنے کا دن ہے۔

صدر مملکت نے حضرت ابراہیم علیہ السلام کے جذبہ قربانی اور ایثار سے سبق حاصل کرنے اور اسے اپنی زندگیوں میں شامل کرنے کا مطالبہ کیا۔

آصف زرداری نے کہا کہ آج ہماری معاشرت کے محروم اور پسماندہ طبقات کی مدد کی اشد ضرورت ہے۔ جانوروں کی قربانی کے عمل کے ساتھ عید ہمیں یہ مقدس عہد کرنے کی تلقین کرتی ہے کہ ہم ہمیشہ ضرورت مندوں کا خیال رکھیں گے۔

دریں اثنا وزیراعظم شہباز شریف نے عیدالاضحیٰ پر قوم کو مبارکباد پیش کرتے ہوئے اپنے خصوصی پیغام میں کہا کہ عیدالاضحیٰ ہمیں صرف جانور کی قربانی کا نہیں، بلکہ اپنی خواہشات، نفس اور ذاتی مفادات کو اعلیٰ قومی مقاصد کیلئے قربان کرنے کا درس دیتی ہے۔

وزیراعظم نے کہا کہ عید صرف جان و مال کی قربانی کا درس نہیں دیتی، بلکہ ہمیں یہ بھی سکھاتی ہے کہ قومیں تب ہی بلند مقام حاصل کرتی ہیں جب وہ ذاتی ترقی کے ساتھ اجتماعی فلاح و بہبود اور ایثار کے جذبے کو بھی دل سے اپناتی ہیں۔

آج ہمیں خاص طور پر اپنے فلسطینی بھائیوں اور بہنوں کو یاد کرنا چاہیے جو بےرحم اور غیر انسانی ظلم و ستم اور بھوک کا سامنا کر رہے ہیں۔

عیدالاضحیٰ کے بابرکت موقع پر فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ائیر اسٹاف ایئر مارشل ظہیر احمد بابر سدھو نے بھی پوری قوم کو دلی مبارکباد پیش کی ہے۔

آئی ایس پی آر کے مطابق افواجِ پاکستان نے اپنے پیغام میں ملک میں پائیدار امن، خوشحالی و قومی یکجہتی کیلئے نیک تمناؤں اور مخلص دعاؤں کا اظہار کیا ہے۔

پیغام میں کہا گیا کہ پاکستانی قوم کی ثابت قدمی کو خراجِ تحسین پیش کرتے ہیں اور افواجِ پاکستان، قانون نافذ کرنے والے اداروں اور بہادر شہریوں کی قربانیوں کو سراہتے ہیں، جو مادرِ وطن کی سلامتی اور استحکام کیلئے ہر محاذ پر ڈٹے ہوئے ہیں۔