وزیراعظم کی مکہ میں سعودی ولی عہد کی جانب سے خصوصی ظہرانے میں شرکت

وزیراعظم شہباز شریف نے جمعہ کے روز مملکتِ سعودی عرب کے دو روزہ دورے کے دوران مکہ مکرمہ میں سعودی ولی عہد اور وزیراعظم محمد بن سلمان کی جانب سے اپنے اعزاز میں دیے گئے خصوصی ظہرانے میں شرکت کی ہے۔

وزیراعظم آفس سے جاری بیان کے مطابق ولی عہد نے وزیراعظم کا خصوصی خیرمقدم کیا اور شخصی طور پر انہیں شاہی محل لے کر گئے، جو کہ دونوں ممالک کے درمیان گہرے اور برادرانہ تعلقات کی علامت ہے۔

اس ظہرانے میں مشرقِ وسطیٰ کی ممتاز قیادت، سعودی کابینہ کے ارکان، اور مملکت کی اعلیٰ سول و عسکری قیادت نے بھی شرکت کی۔

اس موقع پر وزیراعظم شہباز شریف اور ولی عہد محمد بن سلمان کے درمیان غیر رسمی بات چیت بھی ہوئی۔

حکام کے مطابق یہ دورہ اور گرمجوش استقبال پاکستان اور سعودی عرب کے درمیان مضبوط تعلقات کی عکاسی کرتا ہے جو باہمی اعتماد، مشترکہ اقدار اور اسٹریٹجک مفادات پر استوار ہیں۔

یہ دو روزہ دورہ ایسے وقت میں ہو رہا ہے جب دونوں ممالک تجارت، توانائی اور سرمایہ کاری کے شعبوں میں تعاون کو مزید وسعت دینے کی کوششوں میں مصروف ہیں اور حالیہ اعلیٰ سطح کے روابط بھی انہی اقتصادی و علاقائی اہداف کو فروغ دینے کے لیے کیے گئے ہیں۔

دورے کے دوران وزیراعظم شہباز شریف سعودی عرب کے پاکستان اور بھارت کے درمیان حالیہ کشیدگی میں تعمیری کردار پر شکریہ بھی ادا کریں گے۔