کراچی میں نوجوان پر تشدد کا واقعہ، عدالت نے ملزمان کی درخواست ضمانت رد کردی

کراچی کی ایک مقامی عدالت نے کراچی کے علاقے ڈیفنس میں ایک نوجوان پر تشدد کے ہائی پروفائل کیس کے 2 ملزمان کی درخواست ضمانت مسترد کرتے ہوئے انہیں جوڈیشل ریمانڈ پر جیل بھیج دیا۔

یہ واقعہ گزشتہ ماہ ڈیفنس ہاؤسنگ اتھارٹی (ڈی ایچ اے) کراچی میں ٹریفک تنازع کے بعد ایک نوجوان پر ہونے والے تشدد سے متعلقہ ہے جو سوشل میڈیا پر وائرل ہوگیا تھا۔

ملزمان سلمان فاروقی، جو کہ مبینہ طور پر ایک مقامی کمپنی کے سینئر ایگزیکٹو ہیں، اور ان کے ساتھی اویس ہاشمی کو جوڈیشل مجسٹریٹ ساؤتھ کے سامنے پیش کیا گیا۔

عدالت نے ابتدائی سماعت کے بعد دونوں ملزمان کو جوڈیشل ریمانڈ پر جیل بھیجنے کا حکم دیا اور تفتیشی افسر کو ہدایت کی کہ اگلی سماعت میں پیشرفت رپورٹ جمع کروائے۔

سماعت کے دوران متاثرہ فرد، سدھیر، عدالت میں حاضر ہوا اور ایک ملزم کی شناخت کی۔

اس نے جج کو بتایا کہ اسے عدالت کا نوٹس معلوم نہیں تھا اور وہ اپنے وکیل کے مشورے پر پیش ہوا۔

جب پوچھا گیا کہ کیا اس نے کوئی دھمکیاں یا دباؤ محسوس کیا، تو سدھیر نے کہا کہ وہ مزید کیس نہیں چلانا چاہتا اور ملزمان کو معاف کر چکا ہے۔

اس نے کہا کہ میں فیصلہ عدالت پر چھوڑتا ہوں؛ مجھے کوئی اعتراض نہیں ہے۔

تاہم سرکاری وکیل عرفانہ قادری نے درخواست ضمانت کی مخالفت کی اور موقف اختیار کیا کہ ایف آئی آر میں سنگین الزامات شامل ہیں جیسے دھمکیاں دینا اور ایک خاتون کو عوامی طور پر ذلیل کرنا جو کہ قانون کے تحت ناقابل ضمانت جرائم ہیں۔

دونوں فریقین کی دلائل سننے کے بعد عدالت نے دونوں ملزمان کی ضمانت کی درخواستیں مسترد کر دیں۔

فاروقی کے ساتھی ملزم، اویس ہاشمی، اس ہفتے کے شروع میں گرفتار ہوئے تھے، جو اس کیس میں ایک اہم پیش رفت ہے، جسے ایک پریشان کن ویڈیو کے سوشل میڈیا پر گردش کرنے کے بعد وسیع توجہ ملی۔

ویڈیو میں فاروقی کو ایک موٹر سائیکل سوار، جس کی شناخت سدھیر کے طور پر کی گئی، پر حملہ کرتے دیکھا گیا، جو ڈیفنس ہاؤسنگ اتھارٹی میں ایک معمولی ٹریفک حادثے کے بعد ہوا۔

متاثرہ نوجوان کی بہنوں کی بار بار معافی کی درخواستوں کے باوجود، جو موقع پر موجود تھیں، فاروقی نے تشدد جاری رکھا۔

اس واقعے نے شدید غم و غصہ اور متاثرہ نوجوان کے لیے انصاف اور احتساب کے مطالبات کو جنم دیا۔