وزیراعظم شہباز شریف کی ایرانی سپریم لیڈر سے ملاقات، دوطرفہ تعلقات کے فروغ پر زور

وزیراعظم محمد شہباز شریف نے پیر کے روز تہران میں ایران کے سپریم لیڈر آیت اللہ علی خامنہ ای سے ملاقات کی، جس میں خطے کی سیکیورٹی صورتِ حال، بھارت کے ساتھ پاکستان کی حالیہ کشیدگی اور دونوں ممالک کے درمیان تزویراتی تعاون کو فروغ دینے کے امکانات پر بات چیت کی گئی۔ یہ بات وزیراعظم آفس کی جانب سے جاری کردہ بیان میں کہی گئی ہے۔

سپریم لیڈر کے دفتر میں ہونے والی اس ملاقات میں وزیراعظم کے ہمراہ چیف آف آرمی اسٹاف فیلڈ مارشل سید عاصم منیر، نائب وزیراعظم و وزیر خارجہ اسحاق ڈار، وزیر داخلہ محسن نقوی اور وزیر اطلاعات عطا اللہ تارڑ بھی موجود تھے۔ وزیراعظم شہباز شریف نے آیت اللہ خامنہ ای کو عالمِ اسلام کی ممتاز شخصیت قرار دیتے ہوئے ان کے لیے اپنی گہری عقیدت و احترام کا اظہار کیا۔

وزیراعظم محمد شہباز شریف نے ایران کے سپریم لیڈر آیت اللہ علی خامنہ ای سے ملاقات کے دوران پاکستان اور بھارت کے مابین حالیہ کشیدگی پر تفصیلی بریفنگ دی اور نئی دہلی کے تسلط پسندانہ اور تاریخی حقائق مسخ کرنے والے عزائم کی شدید مذمت کی۔

وزیراعظم نے بھارت کے ساتھ حالیہ عسکری بحران کے دوران ایران کی قیادت کی جانب سے پاکستان کے ساتھ یکجہتی پر اظہارِ تشکر کرتے ہوئے کہا کہ پاکستان ہمیشہ خطے میں امن، اقتصادی ترقی اور خوشحالی کا خواہاں رہا ہے۔

انہوں نے موجودہ پیچیدہ جغرافیائی و سیاسی چیلنجز کے تناظر میں پاکستان اور ایران کے تعلقات کو نئی بلندیوں تک پہنچانے کے عزم کا اعادہ کیا۔

وزیراعظم شہباز شریف نے ایران کے امریکا کے ساتھ جوہری مذاکرات میں سفارتی طرزِ عمل کی بھی تعریف کی اور امید ظاہر کی کہ یہ کوششیں خطے میں امن و استحکام کا باعث بنیں گی۔

ایرانی سپریم لیڈر آیت اللہ خامنہ ای نے وزیراعظم شہباز شریف کی خطے میں استحکام اور پاکستان و ایران کے درمیان تعلقات کو مضبوط بنانے کے لیے ذاتی وابستگی کو سراہا۔

انہوں نے پاکستان کی ترقی و خوشحالی کے لیے دعا کی اور عالمِ اسلام میں اتحاد کے فروغ کے لیے وزیراعظم کی کوششوں کو قابلِ تحسین قرار دیا۔