زرعی ترقیاتی بینک نے نیشنل فنانشل لٹریسی پروگرام میں بہترین کارکردگی ایوارڈ اپنے نام کرلیا

زرعی ترقیاتی بینک لمیٹڈ (زیڈ ٹی بی ایل) نے نیشنل فنانشل لٹریسی پروگرام (این ایف ایل پی) 2023-24 میں شاندار کارکردگی کے اعتراف میں ایوارڈ حاصل کیا ہے ۔

گورنر اسٹیٹ بینک آف پاکستان جمیل احمد سے زرعی ترقیاتی بینک کے صدر و سی ای او یعقوب بھٹی نے ایوارڈ وصول کیا۔

زرعی ترقیاتی بینک لمیٹڈ (زیڈ ٹی بی ایل) کی جانب سے منگل کو جاری کردہ ایک بیان میں کہا گیا کہ اسٹیٹ بینک آف پاکستان (ایس بی پی) کی طرف سے مقرر کردہ 310 تربیتی سیشنز کے ہدف کے مقابلے میں زیڈ ٹی بی ایل نے مالی سال 2023-24 کے دوران کامیابی سے 320 سیشنز منعقد کیے، جن میں 10,414 افراد تک رسائی حاصل کی گئی، جن میں 5,281 خواتین بھی شامل تھیں۔ ان آگاہی سیشنز نے مالی شمولیت کو فروغ دینے میں اہم کردار ادا کیا جس کے نتیجے میں پہلے بینکنگ سے محروم افراد کی جانب سے 9,351 نئے بینک اکاؤنٹس کھولے گئے۔

گزشتہ 4 سال (جولائی 2021 سے مارچ 2025) کے دوران زیڈ ٹی بی ایل نے ملک بھر میں 37 ہزار سے زائد افراد کو مالی خواندگی فراہم کی ہے۔

اسٹیٹ بینک نے این ایف ایل پی میں زیڈ ٹی بی ایل کی شاندار کارکردگی کو مستقل طور پر تسلیم کیا ہے۔ اس سال کے میگا پرفارمنس ایوارڈ کے علاوہ زیڈ ٹی بی ایل نے گزشتہ سال اسپیشل پرفارمنس ایوارڈ بھی حاصل کیا تھا۔ 2018 سے اب تک زیڈ ٹی بی ایل کو کراچی میں اسٹیٹ بینک کے مرکزی دفتر کے ساتھ ساتھ لاہور، گوجرانوالہ، اسلام آباد اور فیصل آباد میں اس کے علاقائی دفاتر کی جانب سے 17 ایوارڈز، شیلڈز اور سرٹیفکیٹ آف پرفارمنس سے نوازا جاچکا ہے۔

زرعی ترقیاتی بینک مالی خواندگی کو فروغ دینے کے لیے مکمل طور پر عزم ہے، جو پاکستان میں غربت کے خاتمے، اقتصادی ترقی اور طویل مدتی مالی استحکام کے لیے ضروری ہے۔

گزشتہ دو سال میں بہت سے دیگر کامیابیوں کی طرح یہ کامیابی بھی صدر کی دور اندیش قیادت اور ٹیم پر گہرے اعتماد کا ثبوت ہے۔

کاپی رائٹ بزنس ریکارڈر، 2025