وزیراعلیٰ پنجاب سے امریکی وفد کی ملاقات، سرمایہ کاری پر تبادلہ خیال

وزیراعلیٰ پنجاب مریم نواز شریف سے امریکی وفد نے ملاقات کی جس میں کانگریس مین ٹام سوزی اور جوناتھن جیکسن شامل تھے، ملاقات میں باہمی دلچسپی کے اہم مسائل پر بات چیت کی گئی۔ اس موقع پر پولیٹیکل آفیسر نکھل ہاکن، قائم مقام امریکی سفیر نیٹلی بیکر اور امریکی قونصل جنرل کرسٹین ہاکنز بھی موجود تھیں۔

ملاقات میں پاک امریکا تعلقات کو مزید مستحکم اور فروغ دینے کیلئے موثر اقدامات پر اتفاق کیا گیا۔

امریکی کانگریس کے ارکان نے پنجاب میں سرمایہ کاری اور معاشی ترقی کے لئے وسیع البنیاد دوطرفہ تعاون کو فروغ دینے کے عزم کا اعادہ کیا۔ شرکاء نے پاک امریکا تعلقات کے فروغ، تجارت، سرمایہ کاری اور جمہوری اداروں کے درمیان تعلقات کی مضبوطی پر تفصیلی تبادلہ خیال کیا۔

وزیراعلیٰ پنجاب مریم نواز شریف نے امریکی وفد کو صوبے میں زرعی صنعت، آئی ٹی، توانائی، صحت اور تعلیم کے شعبوں میں سرمایہ کاری کی دعوت دی۔ انہوں نے پارلیمانی سطح پر وفود کے تبادلوں میں مزید اضافے کی امریکی تجویز کا خیرمقدم کیا۔

انہوں نے پنجاب میں غیرملکی اداروں کی سرمایہ کاری کو مزید فروغ دینے میں گہری دلچسپی کا اظہار کیا۔

اُنہوں نے کہا کہ پاکستان اور امریکہ کے درمیان انفارمیشن ٹیکنالوجی کے شعبے میں تعاون کا ایک نیا باب شروع ہوچکا ہے، ہم پاک-امریکہ تعلقات کو دل سے قدر کی نگاہ سے دیکھتے ہیں۔ پاک-امریکہ شراکت داری میں مزید وسعت کی بھرپور گنجائش موجود ہے اور پنجاب اسے ایک نئے رخ پر لے جانے کے لیے پوری طرح تیار ہے۔

انہوں نے مزید کہا کہ پنجاب حکومت صوبے میں غیر ملکی سرمایہ کاری کے فروغ کے لیے خصوصی اقدامات کررہی ہے۔ سرمایہ کاروں کو ’ون ونڈو‘ پلیٹ فارم کے تحت اسپیشل انویسٹمنٹ فیسلیٹیشن کونسل (ایس آئی ایف سی) کے ذریعے تمام سہولیات فراہم کی جا رہی ہیں۔

کاپی رائٹ بزنس ریکارڈر، 2025