پاکستان اور چین کا میری ٹائم پالیسیوں پر تعاون بڑھانے پر اتفاق

پاکستان اور چین نے میری ٹائم پالیسیوں پر رابطہ اور تعاون مضبوط بنانے پر اتفاق کیا ہے اور بحری شعبے میں دوطرفہ اور کثیرالجہتی تعاون کو مزید گہرا کرنے کا عزم ظاہر کیا ہے۔

ان خیالات کا اظہار بیجنگ میں بحری تعاون سے متعلق پاک چین مذاکرات کے پانچویں دور کے دوران کیا گیا۔

ترجمان دفتر خارجہ کی جانب سے جاری بیان میں کہا گیا ہے کہ مذاکرات کی مشترکہ صدارت پاکستان کی وزارت خارجہ کے ایڈیشنل سیکریٹری (ایشیا پیسیفک) عمران احمد صدیقی اور چین کی وزارت خارجہ کے ڈپارٹمنٹ آف باؤنڈری اینڈ اوشن افیئرز کے ڈائریکٹر جنرل ہونگ لیانگ نے کی۔

اعلامیے میں کہا گیا ہے کہ دونوں ممالک نے اپنے تعاون کی پیشرفت کا مثبت جائزہ لیا اور میری ٹائم سیکیورٹی، میرین اکانومی، میرین سائنس اینڈ ٹیکنالوجی اور سمندری ماحولیات جیسے موضوعات پر تفصیلی بات چیت کی۔

انہوں نے اس بات کا بھی اعادہ کیا کہ اعلیٰ سطح کا بحری تعاون پاکستان اور چین کے تمام موسموں کے اسٹریٹجک تعاون شراکت داری کا ایک اہم جزو ہے۔

انہوں نے مشترکہ مستقبل کے ساتھ پاکستان اور چین کی بحری برادری کی مشترکہ تعمیر کے عزم کا بھی اظہار کیا۔

پاکستان اور چین نے سمندری مسائل پر جاری رابطہ برقرار رکھنے، سمندری پالیسیوں پر ہم آہنگی اور تعاون کو مضبوط بنانے، اور بحری شعبے میں دونوں دوطرفہ اور کثیرالجہتی تعاون کو مزید گہرا کرنے پر بھی اتفاق کیا۔

دفتر خارجہ کی جانب سے جاری بیان میں کہا گیا ہے کہ دونوں فریقین نے آئندہ سال مناسب وقت پر پاکستان میں میری ٹائم تعاون سے متعلق پاک چین مذاکرات کا چھٹا دور منعقد کرنے پر بھی اتفاق کیا۔