پاکستان میں اسٹار لنک کی رجسٹریشن کا عمل جاری ہے، پی ٹی اے

پاکستان ٹیلی کمیونیکیشن اتھارٹی (پی ٹی اے) کی جانب سے جاری بیان کے مطابق پاکستان میں اسپیس ایکس کے زیر انتظام سیٹلائٹ انٹرنیٹ گروپ اسٹار لنک کی رجسٹریشن کا عمل ملک کی سیٹلائٹ ریگولیٹری باڈی کے ساتھ جاری ہے۔

پی ٹی اے کے چیئرمین میجر جنرل (ر) حفیظ الرحمان نے اسپین کے شہر بارسلونا میں جی ایس ایم اے موبائل ورلڈ کانگریس 2025 میں اسٹار لنک ٹیم سے ملاقات کی جس میں پاکستان کے ڈیجیٹل کنکٹیویٹی کو بڑھانے کے مواقع پر تبادلہ خیال کیا گیا۔

پی ٹی اے کی جانب سے جاری بیان میں کہا گیا ہے کہ بات چیت میں سستی براڈ بینڈ رسائی کو بہتر بنانے پر توجہ مرکوز کی گئی، خاص طور پر پسماندہ علاقوں میں، تاکہ ڈیجیٹل تقسیم کو ختم کیا جاسکے اور ڈیجیٹل تبدیلی کو تیز کیا جاسکے۔

اجلاس میں چیئرمین پی ٹی اے نے جدت طرازی کو فروغ دینے اور ملک بھر میں رابطے کے لیے ابھرتی ہوئی ٹیکنالوجیز کو فعال بنانے کے عزم کا اعادہ کیا۔

چیئرمین پی ٹی اے نے یہ بھی کہا کہ اسٹار لنک کی رجسٹریشن سیٹلائٹ ریگولیٹری باڈی کے ساتھ جاری ہے جو سیٹلائٹ بیسڈ انٹرنیٹ سروسز کے لیے پی ٹی اے لائسنس کی پیشگی شرط ہے۔

اسٹار لنک کی ٹیم نے سیلولر موبائل خدمات کی مسابقتی دنیا میں سیٹلائٹ پر مبنی انٹرنیٹ حل اور دور دراز علاقوں پر اس کے ممکنہ اثرات کے بارے میں تبادلہ خیال کیا۔ دونوں فریقوں نے مربوط اور بلا تعطل سروسز کے لئے ریگولیٹری فریم ورک اور آپریشنل حکمت عملی پر تبادلہ خیال کیا۔

جنوری میں ٹیکنالوجی کے ارب پتی ایلون مسک نے کہا تھا کہ اسٹار لنک نے پاکستان میں انٹرنیٹ سروس شروع کرنے کے لیے درخواست دی ہے اور وہ حکومت کی منظوری کا انتظار کر رہے ہیں۔

ایلون مسک نے ایکس پر ایک پوسٹ کا جواب دیتے ہوئے کہا کہ ہم حکومت پاکستان سے اجازت ملنے کے منتظر ہیں۔

اس سے قبل قائمہ کمیٹی برائے انفارمیشن ٹیکنالوجی اینڈ ٹیلی کمیونیکیشن نے پی ٹی اے کو پاکستان میں اسٹار لنک سروسز لانے کے عمل کو تیز کرنے کی ہدایت کی تھی۔

چیئرمین پی ٹی اے میجر جنرل (ر) حفیظ الرحمان نے کمیٹی کو بتایا کہ اسٹار لنک نے سیٹلائٹ کے ذریعے انٹرنیٹ خدمات فراہم کرنے کے لیے 2022 میں پاکستان سے رابطہ کیا تھا۔

قومی اسمبلی سیکرٹریٹ کی جانب سے جاری بیان میں بتایا گیا ہے کہ کے حوالے سے کہا گیا ہے کہ پاکستان اسپیس ریگولیٹری اتھارٹی کے ساتھ اس کے معاملات اب بھی زیر غور ہیں۔ جب تک لائسنس کے معاہدے کو حتمی شکل نہیں دی جاتی، پاکستان میں انٹرنیٹ خدمات فراہم نہیں کی جا سکتیں۔

کمیٹی نے پی ٹی اے کو ہدایت کی کہ وہ ملک میں انٹرنیٹ سروسز کی فراہمی کو یقینی بنانے کے لیے اسٹار لنک کے ساتھ کام کو تیز کرے۔