ڈالر کے مقابلے میں روپے کی قدر میں معمولی اضافہ

Rupee's Performance Against US Dollar Since 15 Jan 2025

انٹر بینک مارکیٹ میں بدھ کو امریکی ڈالر کے مقابلے میں پاکستانی روپے کی قدر میں 0.02 فیصد اضافہ ریکارڈ کیا گیا۔

کاروبار کے اختتام پر روپیہ 5 پیسے کے اضافے سے 279.62 روپے پر بند ہوا۔

یاد رہے کہ منگل کو روپیہ 279.67 پر بند ہوا تھا۔

بین الاقوامی سطح پر امریکی ڈالر بدھ کو اپنے بڑے حریفوں کے مقابلے میں 11 ہفتوں کی کم ترین سطح کے قریب رہا جس کی وجہ کمزور معاشی اعدادوشمار کی وجہ سے قلیل مدتی ٹریژری کے منافع میں کمی ہے۔

محفوظ تصور کی جانے والی جاپانی ین مضبوط ہوکر اکتوبر کے بعد اپنی بلند ترین سطح کے قریب پہنچ گئی، کیونکہ امریکی صدر ڈونلڈ ٹرمپ کی انتظامیہ کی جانب سے نئے ٹیرف کے خدشے کے باعث سرمایہ کاروں کا اعتماد کمزور رہا۔ دوسری جانب، کینیڈین ڈالر دو ہفتے کی کم ترین سطح کے قریب رہا، جبکہ اضافی محصولات آئندہ ہفتے نافذ ہونے والے ہیں۔

امریکی ڈالر انڈیکس ایشیائی مارکیٹ کے آغاز میں 0.1 فیصد کم ہو کر 106.17 پر آ گیا، جو پیر کی کم ترین سطح 106.13 کے قریب ہے، جو 10 دسمبر کے بعد سب سے کمزور سطح ہے۔

ایک روز قبل، یو ایس کانفرنس بورڈ نے بتایا کہ اس کا کنزیومر کانفیڈنس انڈیکس 7 پوائنٹس گرکر 98.3 پر آ گیا جو اگست 2021 کے بعد سب سے بڑی کمی ہے اور رائٹرز کے سروے میں شامل ماہرینِ معیشت کی 102.5 کی پیشگوئی سے کافی کم ہے۔

اس نتیجے نے دیگر کمزور معاشی اعدادوشمار میں اضافہ کیا، جس سے مارکیٹ کی توقعات میں مزید دو سہ ماہی پوائنٹ شرح سود میں کٹوتیوں کا امکان بڑھ گیا، جن میں اگلی ممکنہ کٹوتی جولائی میں متوقع ہے۔

روس اور یوکرین کے درمیان ممکنہ امن معاہدے کے نتیجے میں تیل کی قیمتیں 2 ماہ کی کم ترین سطح پر رہیں جبکہ امریکی خام تیل کے ذخیرے میں کمی سے کچھ مدد ملی۔

برینٹ کروڈ کی قیمت 16 سینٹ یا 0.2 فیصد اضافے کے ساتھ 73.18 ڈالر فی بیرل ہوگئی۔

یو ایس ویسٹ ٹیکساس انٹرمیڈیٹ خام تیل کے فیوچر 20 سینٹ یا 0.3 فیصد اضافے کے ساتھ 69.13 ڈالر پر بند ہوئے۔

روس اور یوکرین کے درمیان امن معاہدے کے امکانات بہتر ہو رہے ہیں، آئی این جی اجناس کے حکمت عملی سازوں نے بدھ کے روز ایک نوٹ میں کہا کہ مارکیٹ امریکہ اور یوکرین کے درمیان معدنیات کے معاہدے کے ممکنہ مضمرات پر بھی نظر رکھے ہوئے ہے۔