سعودی عرب میں مقیم پاکستانی آئی ٹی شعبے میں سرمایہ کاری کے خواہاں

سعودی عرب میں مقیم پاکستانی کاروباری افراد اور ان کے سعودی شراکت داروں نے پاکستانی آئی ٹی کمپنیوں اور اسٹارٹ اپس میں سرمایہ کاری میں گہری دلچسپی کا اظہار کیا ہے۔

سعودی عرب کے دارالحکومت ریاض میں منعقد ہونے والے دنیا کے بڑے ٹیکنالوجی تجارتی میلوں میں سے ایک لیپ 2025 میں آئی ٹی اور آئی ٹی سے متعلق خدمات فراہم کرنے والی 100 سے زائد پاکستانی کمپنیوں اور پاکستان سے 1000 مندوبین نے شرکت کی ہے۔

پاکستانی شرکاء نے لیپ کو پاکستانی کمپنیوں کے لئے ایک کامیاب ایونٹ قرار دیا ہے اور کہا ہے کہ پاکستان کی آئی ٹی کمپنیاں بھی سعودی عرب میں پیشہ ور برادری کے ساتھ اسٹریٹجک شراکت داری کی خواہاں ہیں تاکہ آپریشنز قائم کیے جاسکیں، جدت طرازی کو فروغ دیا جاسکے اور خطے میں کاروباری ترقی کو آگے بڑھایا جاسکے۔

سعودی عرب میں سب سے زیادہ پاکستانی تارکین وطن مقیم ہیں اور دس لاکھ سے زائد افراد مملکت میں مقیم ہیں۔ پاکستان کو بھی اپنی ترسیلات زر کا سب سے زیادہ حصہ سعودی عرب سے ملتا ہے۔

سی ای او ہیکسالیز سعد شاہ جو لیپ 2025 میں شرکت کرنے والے پاکستانی وفد کا حصہ تھے، نے کہا کہ سعودی عرب میں مقیم پاکستان کی پیشہ ورانہ کمیونٹی سعودی مارکیٹ میں کاروبار کے قیام اور ترقی کے لیے پاکستانی آئی ٹی اور ٹیک کمپنیوں کے لیے ایک اسٹریٹجک شراکت داری فراہم کرسکتی ہے۔

انہوں نے کہا کہ پاکستانی آئی ٹی کمپنیاں سعودی عرب میں مقیم آئی ٹی ماہرین کو کنسلٹنٹس اور ملازمین کے طور پر بھرتی کرسکتی ہیں تاکہ میزبان ملک میں اپنے کاروبار کو وسعت دے سکیں، بجائے اس کے کہ وہ پاکستان سے عملہ منتقل کرنے کے مہنگے آپشن پر انحصار کریں۔ انہوں نے مزید کہا کہ سعودی عرب میں مقیم پاکستانی کمیونٹی نے بھی ملکی برآمدات کے فروغ کے لیے پاکستانی آئی ٹی اور ٹیک کمپنیوں کو ہر ممکن تعاون فراہم کرنے کا عزم ظاہر کیا ہے۔

پاکستان فری لانسرز ایسوسی ایشن (پی اے ایف ایل اے) کے صدر اور سی ای او طفیل احمد خان نے کہا ہے کہ پاکستانی آئی ٹی انٹرپرینیورز اور کمپنیاں اپنی مہارت اور نیٹ ورکنگ کے باعث سعودی عرب کی مارکیٹ میں آنے والے پاکستانی سرمایہ کاروں کو مفید رہنمائی فراہم کر سکتی ہیں۔

سعودی عرب میں مقیم پاکستانیوں کے پیشہ ورانہ فورم، مجلسِ پاکستان کے پیٹرن ان چیف، ثاقب زبیر کا کہنا ہے کہ سعودی عرب میں مقیم پاکستانی سرمایہ کار، کاروباری شخصیات اور ماہرین نئی آئی ٹی کمپنیوں کے ساتھ قریبی تعاون کے لیے پرعزم ہیں تاکہ وہ سعودی عرب کی ابھرتی ہوئی آئی ٹی مارکیٹ میں کامیابی سے قدم جماسکیں۔

کاپی رائٹ بزنس ریکارڈر، 2025