ڈالر کے مقابلے میں روپے کی قدر میں معمولی کمی

انٹربینک مارکیٹ میں منگل کے کاروباری روز امریکی ڈالر کے مقابلے میں پاکستانی روپے کی قدر میں 0.02 فیصد کی کمی ریکارڈ کی گئی ہے۔

کاروبار کے اختتام پر روپیہ 6 پیسے کی کمی کے بعد 277 روپے 74 پیسے پر بند ہوا۔

اسٹیٹ بینک آف پاکستان (ایس بی پی) کے مطابق پیر کو روپیہ 277.68 پر بند ہوا تھا۔

عالمی سطح پر امریکی ڈالر کی قدر میں کمی واقع ہوئی ہے تاہم یہ ہفتے کے آخر میں جاری ہونے والے اہم امریکی اعداد و شمار سے قبل اپنی حالیہ بلند ترین سطح سے زیادہ دور نہیں رہا جو فیڈرل ریزرو کی پالیسی کی راہ کا تعین کرسکتا ہے۔

منگل کو ڈالر ڈھائی سال میں اپنے بہترین مہینے کی طرف بڑھ رہا ہے کیونکہ اس نے متعدد کرنسیوں کے مقابلے میں 3.5 فیصد اضافہ درج کیا ہے ۔

امریکی معیشت کی لچک کو اجاگر کرنے والے اقتصادی اعداد و شمار نے گزشتہ ایک ماہ کے دوران گرین بیک کو تقویت دی ہے۔

امریکی معیشت کی مضبوطی کو ظاہر کرنے والے متعدد معاشی اعداد و شمار نے گزشتہ ماہ ڈالر کو مستحکم کیا ہے جبکہ آئندہ ہفتے کے امریکی صدارتی انتخابات میں ریپبلکن امیدوار ڈونلڈ ٹرمپ کی کامیابی کے امکانات میں اضافے نے بھی اس کی حمایت کی ہے۔

اس سے قبل، جمعرات کو ستمبر کے یو ایس کور پرسنل کنزمپشن ایکسپنڈیچرز پرائس انڈیکس (جو فیڈ کا پسندیدہ افراط زر کا پیمانہ ہے) کی رپورٹ جاری کی جائے گی، جس کے بعد جمعہ کو نان فارم پے رول کی رپورٹ سامنے آئے گی۔

امریکی ڈالر انڈیکس 104.28 پر تھوڑا سا تبدیل ہوا۔

گزشتہ سیشن میں شدید گراوٹ کے بعد منگل کو تیل کی قیمتوں میں اضافہ ہوا۔

برینٹ کروڈ فیوچر 44 سینٹ یا 0.6 فیصد اضافے کے ساتھ 71.86 ڈالر فی بیرل پر پہنچ گئے جبکہ امریکی ویسٹ ٹیکساس انٹرمیڈیٹ کروڈ 45 سینٹ یا 0.7 فیصد اضافے سے 67.83 ڈالر فی بیرل پر بند ہوا۔

دونوں معاہدوں میں پیر کو 6 فیصد کمی واقع ہوئی جو یکم اکتوبر کے بعد سے کم ترین سطح ہے۔