امریکی عوام نے جنگ کے بجائے امن کے حق میں ووٹ دیا، باقر قالیباف

امریکا کے ساتھ مذاکرات میں ایران کے چیف مذاکرات کار محمد باقر قالیباف نے بدھ کو کہا ہے کہ وسط مدتی انتخابات میں ڈیموکریٹس کے ہاتھوں ری پبلکنز کی شکست سے واضح ہوگیا ہے کہ امریکی عوام نے جنگ نہیں، امن کے حق میں ووٹ دیا ہے۔

ڈیموکریٹس نے شاندار کامیابی حاصل کرتے ہوئے امریکی کانگریس کے دونوں ایوانوں کا مکمل کنٹرول حاصل کرلیا جسے صدر ڈونلڈ ٹرمپ اور ان کی جماعت کے خلاف عوامی ردعمل قرار دیا جارہا ہے۔

انتخابی نتائج نے مہنگائی، محصولات اور ایران کے خلاف ٹرمپ کی جنگ پر امریکی عوام کی شدید ناراضی کو ظاہر کیا ہے۔ جنگ کے باعث ایندھن کی قیمتوں میں غیر معمولی اضافہ ہوا، جس سے پہلے ہی غیر مقبول صدر کے خلاف عوامی بے اطمینانی میں مزید اضافہ ہوا۔

باقر قالیباف نے سماجی رابطے کی ویب سائٹ ایکس پر اپنی پوسٹ میں لکھا کہ ضمیر کی آواز ہو یا مہنگائی کا دباؤ، امریکی عوام نے جنگ کے خلاف ووٹ دیا ہے اور ہم اس پیغام کی تائید کرتے ہیں۔

انہوں نے خبردار کیا کہ اگر امریکی حکومت بین الاقوامی سرپرستوں اور بلیک میل کرنے والوں کے مفادات کی خاطر اپنے عوام کی خواہشات کو نظرانداز کرتی ہے تو اسے معلوم ہونا چاہیے کہ ایران کا انکار سنگین نتائج کا باعث بنے گا۔

فروری میں ایران پر امریکا اور اسرائیل کے حملوں سے شروع ہونے والی جنگ کئی ماہ سے تعطل کا شکار ہے، تاہم اس دوران وقفے وقفے سے فائرنگ اور حملوں کے تبادلے ہوتے رہے ہیں جبکہ خدشہ ہے کہ لڑائی دوبارہ بڑے پیمانے پر شروع ہوسکتی ہے۔