پاکستان اور مالدیپ کا دفاعی تعاون بڑھانے پر اتفاق

پاکستان اور مالدیپ نے علاقائی امن و استحکام کے فروغ کے لیے دفاعی تعاون، ادارہ جاتی روابط اور پیشہ ورانہ تبادلوں کو مضبوط بنانے کی ضرورت پر زور دیا ہے۔

یہ عزم بدھ کو اسلام آباد میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر اور مالدیپ کے صدر ڈاکٹر محمد معیزو کے درمیان ملاقات کے دوران دہرایا گیا۔

پاک فوج کے شعبہ تعلقات عامہ (آئی ایس پی آر) کے مطابق دونوں رہنماؤں نے باہمی دلچسپی کے امور، خطے کی موجودہ سیکیورٹی صورت حال اور دوطرفہ تعاون بڑھانے کے مواقع پر تبادلہ خیال کیا۔

فیلڈ مارشل سید عاصم منیر نے دونوں ممالک کے درمیان دیرینہ دوستانہ تعلقات کو اجاگر کیا اور تعمیری روابط کے ذریعے دوطرفہ تعلقات مزید مضبوط بنانے کے لیے پاکستان کے عزم کا اعادہ کیا۔

مالدیپ کے صدر ڈاکٹر محمد معیزو نے پاک فوج کی پیشہ ورانہ صلاحیتوں کو سراہا اور خطے میں امن و استحکام کے فروغ کے لیے پاکستان کی مسلسل کوششوں کی تعریف کی۔

کاپی رائٹ بزنس ریکارڈر، 2026