روس سے ڈیزل کی اضافی رسد کے امکانات، خام تیل کی قیمتوں میں کمی

عالمی منڈی میں منگل کو خام تیل کی قیمتوں میں کمی ریکارڈ کی گئی، تاہم گزشتہ سیشن میں قیمتوں میں تقریباً 2 ڈالر فی بیرل اضافے کے بعد سرمایہ کار مشرق وسطیٰ میں تیل کی رسد کو لاحق خطرات اور روس سے ڈیزل کی اضافی فراہمی کے امکانات کا جائزہ لے رہے ہیں۔

برینٹ خام تیل کے مستقبل کے سودوں کی قیمت 61 سینٹ یا 0.57 فیصد کمی کے بعد 106.04 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 47 سینٹ یا 0.5 فیصد کمی سے 93.27 ڈالر فی بیرل پر آگئی۔

برینٹ خام تیل کی قیمت پیر کو کاروبار کے اختتام پر 106.65 ڈالر فی بیرل رہی تھی، جو 15 ستمبر کے بعد بلند ترین سطح ہے۔

امریکی صدر ڈونلڈ ٹرمپ نے کہا ہے کہ روس عالمی منڈیوں کو ڈیزل فراہم کرنے پر رضامند ہوگیا ہے۔ ان کی انتظامیہ نے یوکرین جنگ کے باعث ماسکو کی آمدنی محدود کرنے کے لیے روسی ایندھن پر عائد امریکی پابندیاں بھی عارضی طور پر نرم کردی ہیں۔ روس سے اضافی رسد عالمی منڈی میں ایندھن کی قلت کم کرنے میں مدد دے سکتی ہے۔

تاہم مشرق وسطیٰ میں توانائی کے بنیادی ڈھانچے اور بحری راستوں کو لاحق خطرات بدستور برقرار ہیں۔ ہفتے کے اختتام پر ایران کے حمایت یافتہ حوثیوں نے ریاض کے بین الاقوامی ہوائی اڈے کو نشانہ بنایا، جبکہ آبنائے ہرمز کے قریب تیل بردار جہازوں پر حملوں کی اطلاعات بھی سامنے آئیں۔

ان واقعات سے عالمی توانائی کی اہم گزرگاہوں پر رسد متاثر ہونے کے خدشات بڑھ گئے ہیں۔

دریں اثنا، اوپیک کے سیکریٹری جنرل ہیثم الغیث نے پیر کو بتایا کہ تنظیم نے رواں سال تیل کی طلب میں اضافے کا تخمینہ 14 لاکھ بیرل یومیہ سے کم کرکے 4 لاکھ بیرل یومیہ کردیا ہے۔ عالمی منڈی میں طلب کی سست رفتار اور رسد کو لاحق خطرات کے باعث قیمتوں میں اتار چڑھاؤ جاری رہنے کا امکان ہے۔