فلائی دبئی طیارہ تباہ کرنے کی ناکام کوشش، اسرائیل معاملے کی تہہ تک پہنچے گا، نیتن یاہو

اسرائیلی وزیراعظم بنجمن نیتن یاہو نے بدھ کو کہا ہے کہ اسرائیل دبئی سے تل ابیب جانے والی فلائی دبئی کی پرواز کو مبینہ طور پر تباہ کرنے کی کوشش کرنے والے شریک پائلٹ کے بارے میں تحقیقات کی تہہ تک پہنچے گا اور ممکنہ طور پر تحقیقات میں بھی حصہ لے گا۔

فوکس نیوز کے پروگرام ہینٹی میں گفتگو کرتے ہوئے نیتن یاہو نے کہا کہ یہ معلوم کیا جائے گا کہ حملہ آور کے کوئی ساتھی تھے یا نہیں اور آیا ایران اس واقعے کے پیچھے تھا۔ انہوں نے کہا کہ اس بارے میں بہت جلد حقائق سامنے آسکتے ہیں۔

اسرائیلی حکام کے مطابق پرواز ایف زیڈ 1073 میں شریک پائلٹ کی جانب سے طیارہ تباہ کرنے کی مبینہ کوشش کے محرکات کی تحقیقات جاری ہیں۔ نیتن یاہو نے کہا کہ حملہ آور پائلٹ اس وقت سعودی عرب میں زیر تفتیش ہے اور ممکنہ طور پر اسے متحدہ عرب امارات منتقل کیا جائے گا، جہاں سے وہ پرواز پر سوار ہوا تھا۔

حکام کے مطابق دبئی سے تل ابیب جانے والی پرواز کے مسافروں اور عملے نے شریک پائلٹ کی مبینہ کوشش ناکام بنا دی۔ واقعے کے دوران شریک پائلٹ نے طیارے کے پائلٹ کو چاقو مارا، جس کے بعد طیارہ 30 سیکنڈ سے بھی کم وقت میں تقریباً 14 ہزار فٹ نیچے چلا گیا۔

مسافروں اور عملے نے کاک پٹ میں داخل ہوکر شریک پائلٹ کو قابو کیا، جبکہ پرواز میں موجود فلائی دبئی کے دو دیگر پائلٹس نے طیارے کو سعودی عرب کے شہر تبوک میں بحفاظت اتارا۔

فلائی دبئی نے کہا ہے کہ واقعے کی اصل وجوہات تاحال معلوم نہیں اور قبل از وقت قیاس آرائیوں سے گریز کیا جائے۔