ٹرمپ نے امریکی فوجیوں کی ہلاکت سے متعلق چین کی ایران کو مدد کی رپورٹ مسترد کردی

امریکی صدر ڈونلڈ ٹرمپ نے اتوار کو اس رپورٹ کو مسترد کردیا جس میں کہا گیا تھا کہ ایران نے جولائی میں اردن میں ایک حملے سے قبل چینی اداروں سے ایک فوجی اڈے کی سیٹلائٹ تصاویر حاصل کی تھیں۔ اس حملے میں 3 امریکی فوجی ہلاک ہوئے تھے۔

وال اسٹریٹ جرنل کی حالیہ رپورٹ میں اردن حملے کے حوالے سے نام ظاہر نہ کرنے والے امریکی حکام کا حوالہ دیا گیا۔ ٹرمپ سے پوچھا گیا کہ آیا وہ چینی صدر شی جن پنگ کے ساتھ آئندہ ملاقات میں یہ معاملہ اٹھائیں گے، تاہم انہوں نے براہِ راست جواب دینے کے بجائے چین اور امریکا کی جاسوسی سرگرمیوں کو ایک جیسا قرار دیا۔

ٹرمپ نے کہا کہ چین بنیادی طور پر وہی کرتا ہے جو امریکا کرتا ہے اور امریکا بھی چین کی جاسوسی کرتا ہے۔

امریکی اور چینی صدور کی 24 ستمبر کو امریکا میں ملاقات متوقع ہے، تاہم چین نے ابھی باضابطہ طور پر اس کی تصدیق نہیں کی۔

ٹرمپ نے شی جن پنگ کے ساتھ اچھے تعلقات کا بھی اعادہ کیا۔ وال اسٹریٹ جرنل کی رپورٹ کی روئٹرز فوری طور پر تصدیق نہیں کرسکا۔ رپورٹ کے مطابق امریکی حکام نے ایران کو تصاویر فراہم کرنے والے چینی اداروں کی شناخت ظاہر نہیں کی اور بیجنگ کے براہِ راست ملوث ہونے کا الزام بھی نہیں لگایا۔

فروری کے آخر میں ایران کے خلاف امریکی اسرائیلی جنگ شروع ہونے کے بعد کم از کم 18 امریکی اہلکار ہلاک ہوچکے ہیں۔