3 ارب روپے کا رسک پول برآمدات بڑھانے میں مددگار ہوگا، وزیراعظم

وزیراعظم شہباز شریف نے ہفتہ کے روز ایکسپورٹ ڈویلپمنٹ فنڈ (ای ڈی ایف) اور ایکسپورٹ امپورٹ بینک آف پاکستان (ایگزم بینک) کی جانب سے بالخصوص چھوٹے اور درمیانے درجے کے کاروباری اداروں (ایس ایم ایز) کے لیے برآمدی انشورنس کوریج فراہم کرنے کا خیرمقدم کرتے ہوئے کہا ہے کہ اس اقدام سے ملک کی برآمدات میں اضافے میں مدد ملے گی۔

انہوں نے ایکسپورٹ ڈویلپمنٹ فنڈ سے متعلق اجلاس کی صدارت کرتے ہوئے کہا کہ 3 ارب روپے کا رسک پول ایکسپورٹ کریڈٹ انشورنس تک رسائی کو وسعت دے گا، بالخصوص ایس ایم ایز کے لیے، اور کاروباری برادری کو برآمدات کا حجم بڑھانے میں سہولت فراہم کرے گا۔

وزیراعظم نے اس اقدام کو ملک میں چھوٹے اور درمیانے درجے کے کاروبار کے فروغ کے لیے انتہائی خوش آئند قرار دیا اور قومی معیشت کو مضبوط بنانے کے لیے اصلاحات متعارف کرانے پر ای ڈی ایف کی ٹیم کو سراہا۔

وزیراعظم شہباز شریف نے کہا کہ تنظیم نو اور اصلاحات کے بعد ای ڈی ایف کی قیادت نجی شعبے سے تعلق رکھنے والے پیشہ ور افراد کے سپرد کی گئی ہے۔ انہوں نے کہا کہ ای ڈی ایف کے پاس دستیاب تمام فنڈز کاروباری برادری کو سہولت فراہم کرنے کے لیے استعمال کیے جا رہے ہیں۔

وزیراعظم نے کہا کہ یہ اقدامات حکومت پاکستان کے قومی معیشت کے فروغ اور برآمدات میں اضافے کے عزم کی عکاسی کرتے ہیں۔ انہوں نے مزید کہا کہ اس طرح کے اقدامات پاکستان کو سرمایہ کاری کے عالمی مرکز کے طور پر ابھرنے میں مدد دیں گے۔ ان کا کہنا تھا کہ حکومت کے اقدامات برآمدات پر مبنی معیشت کے فروغ کے عزم کو پورا کرنے کے لیے کیے جا رہے ہیں۔

اجلاس کے دوران وزیراعظم کو ایکسپورٹ ڈویلپمنٹ فنڈ کی تنظیم نو اور اصلاحات کے حوالے سے بریفنگ دی گئی۔ اجلاس کو بتایا گیا کہ ای ڈی ایف کے پاس دستیاب 24 ارب روپے کی مکمل رقم کاروباری برادری کو سہولت فراہم کرنے کے لیے سرمایہ کاری کے لیے مختص کر دی گئی ہے۔

اجلاس کو مزید بتایا گیا کہ انفرااسٹرکچر پر کوئی اضافی اخراجات نہیں کیے جائیں گے، جبکہ ای ڈی ایف اقتصادی ترقی اور کاروباری سہولت کے لیے تحقیق، مہارتوں کے فروغ اور مسابقتی صلاحیت بہتر بنانے سے متعلق اقدامات کر رہا ہے۔

بریفنگ میں یہ بھی بتایا گیا کہ جی ایس پی پلس کے تحت پاکستان کے ترجیحی تجارتی انتظام میں توسیع کے حوالے سے اقدامات کیے جا رہے ہیں تاکہ یورپی منڈی تک ملک کی رسائی برقرار رکھی جا سکے۔

اجلاس میں نائب وزیراعظم و وزیر خارجہ محمد اسحاق ڈار، وفاقی وزراء محمد اورنگزیب، رانا تنویر حسین، جام کمال خان اور احد خان چیمہ، وزیر مملکت برائے خزانہ بلال اظہر کیانی، وزیراعظم کے مشیر ہارون اختر، ای ڈی ایف بورڈ کے چیئرمین عمر سعید اور متعلقہ اداروں کے سینئر حکام نے شرکت کی۔