روس کا بحیرہ اسود میں مال بردار جہاز پر حملہ، 5 افراد ہلاک، متعدد لاپتا

یوکرین کے حکام نے کہا ہے کہ روسی افواج نے بحیرہ اسود میں یوکرین کے جنوبی شہر اوڈیسا کے قریب ایک بین الاقوامی مال بردار جہاز کو نشانہ بنایا، جس کے نتیجے میں کم از کم پانچ افراد ہلاک جبکہ متعدد لاپتا ہو گئے۔

یوکرین کے وزیر اعظم سرہی کوریٹسکی کے مطابق گنی بساؤ کے پرچم تلے چلنے والا جہاز مکئی کی کھیپ لے کر بندرگاہ سے روانہ ہوا تھا۔ جہاز پر 17 بھارتی اور شامی ملاحوں کے علاوہ ایک یوکرینی شہری بھی سوار تھا۔

انہوں نے بتایا کہ آٹھ افراد کو بحفاظت بچا لیا گیا، جبکہ جہاز اتوار کی رات تک آگ کی لپیٹ میں رہا اور پانچ افراد تاحال لاپتا ہیں۔

خبر رساں ادارے رائٹرز کے ایک نمائندے نے اوڈیسا کے ساحل کے قریب سمندر میں موجود جہاز سے دھواں اٹھتے ہوئے دیکھا، تاہم روس کی جانب سے اس حملے پر فوری طور پر کوئی تبصرہ نہیں کیا گیا۔

یوکرینی قائم مقام وزیر خارجہ آندری سیبیہا نے کہا کہ یہ ایک شہری مال بردار جہاز تھا، جس پر بین الاقوامی عملہ موجود تھا اور یہ عالمی غذائی تحفظ سے وابستہ راستے پر سفر کر رہا تھا۔ انہوں نے الزام عائد کیا کہ روس نے ایک بار پھر شہری ہدف کو نشانہ بنایا۔

واضح رہے کہ روس نے حالیہ ہفتوں میں جنوبی یوکرین کی گہری پانی کی بندرگاہوں پر حملے تیز کر دیے ہیں، جہاں سے اناج اور دیگر اہم تجارتی سامان دنیا بھر کو برآمد کیا جاتا ہے۔