نائب وزیر اعظم اسحاق ڈار قاہرہ میں 4 ملکی وزرائے خارجہ اجلاس میں شرکت کریں گے

دفترِ خارجہ نے بتایا کہ نائب وزیرِ اعظم اور وزیرِ خارجہ سینیٹر اسحاق ڈار 21 جون کو قاہرہ میں 4 ملکی (آر 4 گروپ ) وزرائے خارجہ کے چوتھے اجلاس میں شرکت کریں گے۔

بیان کے مطابق اس اجلاس کی ميزبانی مصری وزیرِ خارجہ ڈاکٹر بدر عبد العاطی کر رہے ہیں، جس میں مصر، سعودی عرب، ترکیہ اور پاکستان کے وزرائے خارجہ علاقائی صورتحال پر تبادلہ خیال کرنے اور امن، سلامتی اور استحکام سے متعلق امور پر مشاورت کے لیے جمع ہوں گے۔

دفترِ خارجہ کا کہنا ہے کہ وزرائے خارجہ گزشتہ آر 4 اجلاسوں کے نتائج کا جائزہ بھی لیں گے اور مشترکہ مفادات کے شعبوں میں تعاون کو مزید مضبوط بنانے کے راستے تلاش کریں گے۔

دورہ مصر کے دوران اسحاق ڈار اپنے مصری ہم منصب ڈاکٹر بدر عبد العاطی کے ساتھ دوطرفہ مشاورت کریں گے اور صدر عبدالفتاح السیسی سے بھی ملاقات کریں گے۔

توقع ہے کہ ان ملاقاتوں میں متعدد شعبوں میں پاکستان اور مصر کے درمیان تعاون بڑھانے کے ساتھ ساتھ باہمی دلچسپی کے علاقائی و بین الاقوامی حالات پر تبادلہ خیال کیا جائے گا۔ بیان میں مزید کہا گیا ہے کہ پاکستان مصر، سعودی عرب اور ترکیہ کے ساتھ اپنے روابط کو انتہائی اہمیت دیتا ہے اور آر 4 فریم ورک علاقائی امن، استحکام اور خوشحالی کے فروغ کے لیے ان ممالک کے باہمی مشاورت، تعاون اور مربوط کوششوں کے عزم کا عکاس ہے۔