وائٹ ہاؤس کا ایران کے معاہدہ مسودے سے متعلق دعویٰ مسترد، رپورٹ کو 'مکمل من گھڑت' قرار دے دیا

امریکی صدارتی دفتر نے بدھ کے روز ایران کے سرکاری ٹی وی کی اُس رپورٹ کو سختی سے مسترد کر دیا جس میں امریکا کے ساتھ مشرقِ وسطیٰ میں جنگ کے خاتمے سے متعلق ایک فریم ورک معاہدے کا دعویٰ کیا گیا تھا، اور اسے ”مکمل طور پر من گھڑت“ قرار دیا گیا۔

ایرانی رپورٹ میں ایک ابتدائی مسودۂ مفاہمتی یادداشت ( ایم او یو) کا حوالہ دیتے ہوئے کہا گیا تھا کہ اس میں امریکا کی جانب سے ایران پر بحری ناکہ بندی ختم کرنے اور خلیجی خطے سے اپنی افواج کے انخلا کی شقیں شامل ہیں۔

امریکی صدارتی دفتر نے سوشل میڈیا پلیٹ فارم ایکس پر کہا کہ ”ایرانی کنٹرولڈ میڈیا کی یہ رپورٹ درست نہیں اور جو ایم او یو انہوں نے جاری کیا ہے وہ مکمل طور پر من گھڑت ہے۔ کسی کو بھی ایرانی سرکاری میڈیا کی باتوں پر یقین نہیں کرنا چاہیے۔ حقائق اہم ہیں۔“

امریکی صدر کے دفتر نے اس موقع پر بعض امریکی میڈیا اداروں کو بھی تنقید کا نشانہ بنایا جنہوں نے ایرانی دعووں کو رپورٹ کیا تھا۔