غزہ جانے والے امدادی فلوٹیلا کو اسرائیلی فوج نے روک لیا

اسرائیلی فوج نے غزہ جانے والے امدادی بحری بیڑے کو پیر کے روز روکنے کے لیے کارروائی شروع کر دی، جبکہ منتظمین کے مطابق بحری بیڑے میں شامل ایک جہاز کو قبرص کے مغرب میں روک لیا گیا ہے۔

گلوبل صمود فلوٹیلا نے سوشل میڈیا پلیٹ فارم ایکس پر بیان میں کہا کہ اسرائیلی فوجی جہاز ان کے بیڑے کو روک رہے ہیں اور اسرائیلی دفاعی افواج کے اہلکار دن کی روشنی میں ان کے پہلے جہاز پر سوار ہو چکے ہیں۔

تنظیم نے مطالبہ کیا کہ ان کے قانونی اور غیر پرتشدد انسانی مشن کو محفوظ راستہ فراہم کیا جائے۔ بیان میں کہا گیا کہ حکومتیں فوری مداخلت کریں تاکہ ان غیر قانونی اقدامات اور بحری قزاقی کو روکا جا سکے، جن کا مقصد غزہ پر اسرائیلی محاصرہ برقرار رکھنا ہے۔

گزشتہ ہفتے تقریباً 50 جہاز ترکیہ کے جنوب مغربی ساحل سے روانہ ہوئے تھے۔ اسرائیل نے پیر کے روز واضح کیا کہ وہ غزہ کی بحری ناکہ بندی کی کسی بھی خلاف ورزی کی اجازت نہیں دے گا۔

یہ ایک سال کے دوران غزہ کا محاصرہ توڑنے کی تیسری کوشش ہے۔ اسرائیل اور حماس کے درمیان اکتوبر 2023 میں جنگ شروع ہونے کے بعد غزہ میں خوراک، پانی، ادویات اور ایندھن کی شدید قلت پیدا ہو چکی ہے۔

اسرائیلی حکام امداد کی قلت کے دعوؤں کو مسترد کرتے ہیں اور کہتے ہیں کہ غزہ میں سامان کی فراوانی موجود ہے۔