ملک بھر میں پیر سے جمعہ تک طوفانی بارشوں اور تیز ہواؤں کی پیشگوئی

نیشنل ڈیزاسٹر مینجمنٹ اتھارٹی (این ڈی ایم اے) نے پیر سے جمعہ تک پاکستان کے متعدد حصوں میں تیز ہواؤں، آندھی اور گرج چمک کے ساتھ موسلادھار بارش اور کہیں کہیں ژالہ باری (اولے پڑنے) کا الرٹ جاری کر دیا ہے۔

حکام کے مطابق پنجاب میں آندھی، گرد آلود ہواؤں اور ژالہ باری کا امکان ہے، جبکہ راولپنڈی، اسلام آباد، مری، اٹک، چکوال، لاہور، سیالکوٹ، قصور، ملتان اور ان کے گردونواح کے علاقوں میں بارش کی پیشگوئی کی گئی ہے۔

بلوچستان میں کوئٹہ، ژوب، زیارت، چمن اور خضدار میں تیز ہواؤں اور گرج چمک کے ساتھ بارش اور چند مقامات پر ژالہ باری متوقع ہے، جبکہ صوبے کے دیگر اضلاع میں درجہ حرارت بڑھنے کا امکان ہے۔

این ڈی ایم اے کا مزید کہنا ہے کہ خیبر پختونخوا کے مختلف اضلاع بشمول چترال، سوات، پشاور، بنوں، ایبٹ آباد، مانسہرہ اور لنڈی کوتل میں بھی اس دوران بارش اور گرج چمک کا امکان ہے۔

علاوہ ازیں گلگت بلتستان اور آزاد جموں و کشمیر کے علاقوں گلگت، اسکردو، ہنزہ، استور، مظفرآباد، وادی نیلم، باغ اور کوٹلی میں بھی گرج چمک اور چند مقامات پر ژالہ باری کی پیشگوئی کی گئی ہے۔