بھارت کو فوجی محاذ پر عبرتناک شکست دی، وزیرعظم، معرکہ حق کی یاد میں تقریب

وزیراعظم شہباز شریف نے اتوار کے روز کہا کہ پاکستان نے گزشتہ سال بھارت کو فوجی محاذ پر عبرتناک شکست دی تھی۔ یہ تنازع اس وقت شروع ہوا جب بھارت نے پہلگام واقعے کو جواز بنا کر پاکستان پر بے بنیاد الزامات عائد کیے تھے، جسے پاکستان نے ایک منظم ڈرامہ قرار دیا۔

وزیراعظم نے یہ بات پاکستان مونومنٹ میں منعقدہ بنیان المرصوص کی قومی تقریب 2026 سے خطاب کرتے ہوئے کہی، جو پاکستان اور بھارت کے درمیان گزشتہ سال ہونے والے فوجی تصادم کے ایک سال مکمل ہونے کی یاد میں منعقد کی گئی۔ پاکستان نے اس معرکے کو معرکۂ حق کا نام دیا تھا۔

تقریب میں صدر آصف علی زرداری، نائب وزیراعظم اسحاق ڈار، اعلیٰ حکومتی شخصیات، مسلح افواج کے سربراہان، ارکان پارلیمنٹ، غیر ملکی سفارتکاروں اور دیگر معززین نے شرکت کی۔

وزیراعظم شہباز شریف نے کہا کہ آج تک بھارت پہلگام واقعے میں پاکستان کے ملوث ہونے کا ایک بھی ثبوت پیش کرنے میں ناکام رہا ہے۔

انہوں نے اعلان کیا کہ 10 مئی کو سرکاری طور پر معرکۂ حق کی فتح کے دن کے طور پر منایا جائے گا۔

وزیراعظم نے بھارتی جارحیت کا منہ توڑ جواب دینے پر پاک فضائیہ کو خراج تحسین پیش کیا۔ انہوں نے خاص طور پر ایئر چیف مارشل ظہیر احمد بابر سدھو کے کردار کو سراہتے ہوئے کہا جب ہمارے شاہینوں نے حملہ کیا تو دشمن کو اپنی جان بچانا مشکل ہو گئی تھی۔

انہوں نے کہا کہ دشمن نے رات کی تاریکی میں حملہ کیا، لیکن ہماری مسلح افواج نے بھرپور جواب دیا۔ ہم اللہ تعالیٰ کے شکر گزار ہیں کہ اس نے ہمیں فتح اور عزت سے نوازا۔

وزیراعظم نے چیف آف ڈیفنس اسٹاف عاصم منیر کے کردار کی بھی تعریف کی۔

انہوں نے امریکا کے صدر ڈونلڈ ٹرمپ کا بھی شکریہ ادا کیا اور کہا کہ انہوں نے لاکھوں جانیں بچانے میں کردار ادا کیا۔

مزید برآں، وزیراعظم نے چین کے صدر شی جن پنگ کو بھی خراج تحسین پیش کیا۔

خطے کی موجودہ صورتحال اور امریکا و ایران کے درمیان کشیدگی کم کرنے کے لیے پاکستان کی کوششوں سے متعلق وزیراعظم نے کہا کہ ہماری مخلصانہ کوششیں جاری ہیں، اور فیلڈ مارشل عاصم منیر نے ابھی کچھ دیر پہلے مجھے بتایا ہے کہ ہمیں ایران کا جواب موصول ہو گیا ہے۔

تاہم انہوں نے اس حوالے سے مزید تفصیلات فراہم نہیں کیں۔

انہوں نے کہا کہ میں اس سے زیادہ تفصیلات نہیں بتا سکتا، لیکن میں نائب وزیراعظم اسحاق ڈار کی کوششوں کو سراہتا ہوں اور فیلڈ مارشل عاصم منیر کو مبارکباد دیتا ہوں، جنہوں نے خود کو اس مقصد کے لیے وقف کر رکھا ہے۔

خطاب کے آغاز سے قبل وزیراعظم شہباز شریف نے گزشتہ سال کے تصادم میں شہید ہونے والوں کے لیے ایک منٹ کی خاموشی اختیار کی۔

اس سے قبل صدر آصف علی زرداری نے کہا کہ 10 مئی پاکستان کی تاریخ کا ایک سنہری باب بن چکا ہے۔

صدر مملکت نے کہا کہ پاکستان کی مسلح افواج نے بھارت کے آٹھ جدید لڑاکا طیارے تباہ کیے۔ انہوں نے مزید کہا کہ گزشتہ سال کے مسلح تصادم میں چیف آف ڈیفنس اسٹاف کی قیادت میں افواج پاکستان نے غیر معمولی بہادری کا مظاہرہ کیا۔

صدر زرداری نے کہا کہ بزدل دشمن نے رات کی تاریکی میں ہماری مساجد اور معصوم شہریوں کو نشانہ بنایا، مگر ہماری مسلح افواج نے ایسا بھرپور جواب دیا جس کا دشمن تصور بھی نہیں کر سکتا تھا۔

معرکۂ حق کے حوالے سے اپنے سرکاری پیغام میں صدر مملکت نے کہا کہ جب بھارت نے پہلگام فالس فلیگ آپریشن کی آڑ میں بلا اشتعال حملے کیے اور شہری علاقوں سمیت فوجی تنصیبات کو نشانہ بنایا تو پاکستان نے نظم و ضبط، درست حکمت عملی، جرات اور اتحاد کے ساتھ جواب دیا۔

انہوں نے کہا کہ آپریشن بنیان المرصوص، جو معرکۂ حق کا فیصلہ کن حصہ تھا، نے یہ ثابت کیا کہ جب پوری قوم متحد ہو تو ہماری مسلح افواج کیا کچھ کرنے کی صلاحیت رکھتی ہیں۔

صدر مملکت نے مزید کہا کہ معرکۂ حق نے دنیا کو دکھا دیا کہ پاکستان کی دفاعی صلاحیت محض نعرہ نہیں بلکہ پیشہ ورانہ مہارت، تینوں افواج کے باہمی تعاون اور ایک ایسے قوم کے عزم پر مبنی ہے جو جارحیت کے سامنے خاموش نہیں بیٹھ سکتی۔

کاپی رائٹ بزنس ریکارڈر، 2026