لبنانی اور اسرائیلی رہنما دہائیوں بعد رابطے میں ہوں گے، ٹرمپ

امریکی صدر ڈونلڈ ٹرمپ نے کہا ہے کہ لبنان اور اسرائیل کے رہنما ایک دوسرے سے بات کریں گے، اور وہ دونوں ممالک کے درمیان کچھ سانس لینے کی گنجائش پیدا کرنے کی کوشش کر رہے ہیں، جو اسرائیل اور لبنانی مسلح تنظیم حزب اللہ کے درمیان چھ ہفتوں سے جاری جنگ کے بعد سامنے آیا ہے۔

ڈونلڈ ٹرمپ نے سوشل میڈیا پر ایک پوسٹ میں کہا کہ دونوں رہنماؤں کے درمیان کافی عرصے سے بات چیت نہیں ہوئی، اور ممکنہ طور پر یہ رابطہ جلد بحال ہو گا۔ تاہم انہوں نے یہ واضح نہیں کیا کہ لبنان اور اسرائیل کی جانب سے کون سے رہنما اس گفتگو میں شامل ہوں گے۔

اسرائیل اور لبنان کی قیادت کی جانب سے اس حوالے سے فوری طور پر کوئی ردعمل سامنے نہیں آیا۔ یہ تنازع اس وقت شدت اختیار کر گیا جب ایران کے ساتھ جاری جنگ کے دوران حزب اللہ نے ایران کی حمایت میں کارروائیاں شروع کیں، جس کے جواب میں اسرائیل نے لبنان میں فوجی کارروائیوں کا آغاز کیا۔

ادھر امریکی انتظامیہ نے ایران کے ساتھ ممکنہ امن معاہدے پر امید کا اظہار کیا ہے، جبکہ اسرائیل کی سکیورٹی کابینہ نے لبنان میں ممکنہ جنگ بندی پر غور کے لیے اجلاس بھی طلب کیا۔

اسرائیلی وزیراعظم نے کہا ہے کہ فوجی کارروائیاں جاری رہیں گی، جبکہ لبنان کے حکام کا کہنا ہے کہ اسرائیل جنگی میدان میں برتری حاصل کرنے کے بعد ہی سفارتی پیش رفت چاہتا ہے۔ اس دوران سرحدی علاقوں میں راکٹ حملوں اور سائرن کی آوازیں بھی سنی گئیں، تاہم فوری طور پر کسی جانی نقصان کی اطلاع نہیں ملی۔