امریکہ نائب صدر جے ڈی وینس کو ایران مذاکرات کیلئے پاکستان بھیجے گا، وائٹ ہاؤس

امریکی صدر ڈونلڈ ٹرمپ نے ایران کے ساتھ مذاکرات کے لیے اپنے اعلیٰ سطح وفد کو پاکستان بھیجنے کا فیصلہ کیا ہے۔ وائٹ ہاؤس کے مطابق نائب صدر جے ڈی وینس، مشرق وسطیٰ کے خصوصی ایلچی اسٹیو وٹکوف اور سابق مشیر جیرڈ کشنر اس وفد کی قیادت کریں گے اور ہفتے کے روز اسلام آباد میں ایران کے ساتھ مذاکرات شروع ہوں گے۔

یہ پیش رفت امریکہ اور ایران کے درمیان پاکستان کی ثالثی میں ہونے والی دو ہفتوں کی جنگ بندی کے بعد سامنے آئی ہے۔ صدر ٹرمپ نے کہا ہے کہ امریکہ ایران کے ساتھ قریبی تعاون کرے گا اور دونوں ممالک ٹیرف اور پابندیوں میں نرمی پر بھی بات چیت کر رہے ہیں۔

قبل ازیں ٹرمپ نے ایران کو آبنائے ہرمز کھولنے کے لیے دی گئی ڈیڈ لائن سے محض دو گھنٹے قبل مکمل حملے کا فیصلہ واپس لے لیا تھا۔ وزیر اعظم شہباز شریف نے اس ڈیڈ لائن میں توسیع کی درخواست کی تھی، جس کے بعد جنگ بندی کا اعلان کیا گیا۔

تاہم خطے میں کشیدگی برقرار ہے، کیونکہ اسرائیل نے لبنان پر شدید حملے جاری رکھے، جس کے باعث جنگ بندی کی خلاف ورزی کے خدشات پیدا ہو گئے ہیں۔ ایرانی وزیر خارجہ عباس عراقچی نے ان حملوں پر تشویش کا اظہار کرتے ہوئے پاکستانی حکام، بالخصوص فیلڈ مارشل عاصم منیر سے رابطہ کیا ہے۔ رپورٹس کے مطابق ایران نے عندیہ دیا ہے کہ اگر حملے جاری رہے تو وہ جنگ بندی سے دستبردار ہو سکتا ہے۔