پاکستانی کین بنانے والی کمپنی افغانستان میں 110 ملین ڈالر کا پلانٹ قائم کرے گی

پاکستان ایلومینیم بیوریج کینز لمیٹڈ (پی اے بی سی) نے افغانستان میں 110 ملین ڈالر کی لاگت سے نئی بیوریج کین تیار کرنے والی فیکٹری قائم کرنے کے منصوبے کا اعلان کیا ہے۔

کمپنی نے منگل کو پاکستان اسٹاک ایکسچینج (پی ایس ایکس) کو جاری کردہ نوٹس کے ذریعے اس پیش رفت سے آگاہ کیا۔

نوٹس کے مطابق کمپنی نے 30 اکتوبر 2025 کو ہی بورڈ آف ڈائریکٹرز کی جانب سے افغانستان میں 1.3 ارب کین سالانہ پیداواری صلاحیت کے حامل یونٹ کے قیام کی منظوری دے دی تھی، تاہم یہ منصوبہ ریگولیٹری اور دیگر روایتی منظوریوں سے مشروط ہے جنہں حتمی مرحلے میں لایا جا رہا ہے۔

پی اے بی سی نے کہا کہ حالیہ منظوری کمپنی کے اسٹریٹجک روڈ میپ کے تحت مسلسل پیش رفت کی عکاس ہے۔

یہ پیش رفت ایسے وقت میں سامنے آئی جب پاکستان اور افغانستان کے درمیان تعلقات میں کشیدگی پائی جارہی ہے۔ اسلام آباد کی جانب سے افغان طالبان انتظامیہ سے شدت پسندوں کے خلاف کارروائی کے مطالبے کے بعد دونوں ممالک کے تعلقات مزید کشیدہ ہوگئے ہیں جبکہ سرحدی گزرگاہوں کی بندش کے باعث دو طرفہ تجارت شدید متاثر ہوئی ہے۔

اکتوبر میں پی اے بی سی نے خبردار کیا تھا کہ پاک افغان سرحد کی مسلسل بندش سے اس کی فروخت اور علاقائی کاروباری سرگرمیوں پر منفی اثرات مرتب ہو سکتے ہیں، خصوصاً افغانستان اور وسطی ایشیا میں آپریشنز متاثر ہونے کا خدشہ ہے۔

دوسری جانب کمپنی کے بورڈ آف ڈائریکٹرز نے الفلاح ایگری کلٹیویشن فنڈ۔ون کے 60 فیصد یونٹس لبرٹی ملز لمیٹڈ سے 621 ملین روپے میں خریدنے کی بھی منظوری دے دی ہے۔

بیان میں کہا گیا کہ یہ فنڈ پاکستان میں جدید، مشینی اور پائیدار کارپوریٹ فارمنگ منصوبوں پر توجہ مرکوز کرتا ہے جبکہ چولستان کے صحراء میں ٹیرا کروپ انوویشنز (پرائیویٹ) لمیٹڈ میں اس کی سرمایہ کاری سے غذائی تحفظ میں بہتری، زرعی برآمدات کے فروغ اور درآمدی متبادل کو تقویت ملنے کی توقع ہے۔

کمپنی نے بتایا کہ یہ لین دین روایتی طریقۂ کار کی تکمیل سے مشروط ہے اور بورڈ نے پی اے بی سی کے نمائندوں کو اس منصوبے پر عملدرآمد کے لیے ضروری اقدامات کی منظوری دے دی ہے۔