بھارت، کاکروچ پارٹی کے احتجاج سے قبل نئی دہلی کا پارک بند کردیا گیا

نئی دہلی میں حکام نے جمعے کو ایک مرکزی پارک بند کر دیا، جہاں بھارت کے چیف الیکشن کمشنر کی برطرفی کے مطالبے کے لیے احتجاج کی تیاری کی جا رہی تھی۔ ناقدین کا الزام ہے کہ انتخابی فہرستوں میں نظرثانی کے عمل سے لاکھوں افراد حقِ رائے دہی سے محروم ہو گئے ہیں۔

کاکروچ جنتا پارٹی (سی جے پی) کی جانب سے منظم کی جانے والی اس مہم نے وزیراعظم نریندر مودی کی جماعت کے خلاف اپوزیشن کے غصے کو نمایاں کر دیا ہے۔ تاہم، بھارتی الیکشن کمیشن نے کسی بھی بے ضابطگی کی تردید کی ہے۔

سی جے پی کے بانی ابھیجیت دپکے نے حامیوں سے سینٹرل پارک میں جمع ہونے کی اپیل کی۔ اس سے قبل ان کے دو ساتھیوں کو جنتر منتر پر سکیورٹی رکاوٹیں عبور کرنے پر حراست میں لیا گیا تھا۔

جمعے کو شہر کے مختلف علاقوں میں ہزاروں سکیورٹی اہلکار تعینات کیے گئے، جبکہ اہم چوراہوں پر رکاوٹیں کھڑی کی گئیں۔ پولیس نے کناٹ پلیس کے اطراف عوامی اجتماعات پر بھی پابندی عائد کر دی۔

میڈیا رپورٹس کے مطابق انتخابی فہرستوں پر نظرثانی کے دوران 13 کروڑ سے زائد نام خارج کیے گئے۔ ناقدین کا کہنا ہے کہ اس اقدام سے بالخصوص مسلمانوں سمیت اقلیتی برادریاں متاثر ہوئی ہیں، جبکہ انتخابی حکام کے مطابق مقصد دہری، فوت شدہ اور جعلی اندراجات ختم کرنا تھا۔

بھارتی وزیر دفاع راج ناتھ سنگھ نے اپوزیشن پر جمہوری اداروں کو نقصان پہنچانے اور ملک میں بدامنی پھیلانے کی کوشش کا الزام عائد کیا۔