مئی میں 3 ہزار سے زائد نئی کمپنیاں رجسٹرڈ، آئی ٹی کا شعبہ سرفہرست رہا

سیکیورٹیز اینڈ ایکسچینج کمیشن آف پاکستان (ایس ای سی پی) کے مطابق مئی کے دوران ملک بھر میں 3,161 نئی کمپنیاں رجسٹرڈ ہوئیں۔

ایس ای سی پی کے مطابق ملک بھر میں رجسٹرڈ کمپنیوں کی مجموعی تعداد بڑھ کر 297,239 تک پہنچ گئی ہے۔

بیان میں مزید بتایا گیا کہ 99 فیصد کمپنیوں کا اندراج آن لائن کیا گیا جن میں سے 260 کمپنیاں خیبر پختونخوا، 112 گلگت بلتستان اور 71 کمپنیاں بلوچستان میں رجسٹرڈ ہوئیں۔

دوسری جانب پنجاب میں 1,643 کمپنیاں، اسلام آباد میں 596 اور سندھ میں 479 کمپنیاں رجسٹرڈ کی گئیں۔

رپورٹ کے مطابق مئی میں آئی ٹی (انفارمیشن ٹیکنالوجی) اور ای کامرس کے شعبے میں سب سے زیادہ نئی کمپنیوں کی رجسٹریشن ریکارڈ کی گئی۔

انفارمیشن ٹیکنالوجی (آئی ٹی) کا شعبہ 598 نئی رجسٹرڈ کمپنیوں کے ساتھ تمام صنعتوں میں سرِفہرست رہا جس کے بعد ٹریڈنگ (تجارتی) سیکٹر 503 رجسٹریشنز کے ساتھ دوسرے اور سروسز (خدمات) کا شعبہ 404 رجسٹریشنز کے ساتھ تیسرے نمبر پر رہا۔

دوسری جانب رئیل اسٹیٹ اور تعمیراتی شعبے میں 303 نئی کمپنیوں کا اندراج دیکھا گیا۔

اسی طرح مئی کے دوران سیاحت اور ٹرانسپورٹ کے شعبے میں 206 نئی کمپنیوں کی رجسٹریشن ریکارڈ کی گئی۔

بیان کے مطابق غیر ملکی سرمایہ کاری کی سرگرمیاں بھی مستحکم رہیں جہاں 17 ممالک سے تعلق رکھنے والے سرمایہ کاروں نے پاکستان میں کمپنیاں رجسٹرڈ کروائیں۔

ایس ای سی پی کے مطابق ان کمپنیوں میں چین سے تعلق رکھنے والے 89 شیئر ہولڈرز نے ڈائریکٹرز کے عہدے حاصل کیے۔

غیر ملکی سرمایہ کاروں کی جانب سے قائم کی جانے والی ان کمپنیوں کا مجموعی پیڈ اپ کیپیٹل (ادا شدہ سرمایہ) 13 کروڑ 94 لاکھ (139.4 ملین) روپے ہے۔